ඉරානය පාකිස්තානයට එල්ල කළ ප්‍රහාරයෙන් පසු පාකිස්තානය ඉරානයට එල්ල කළ මිසයිල ප්‍රහාරවලින් පුද්ගලයින් 9 දෙනෙකු මිය ගොස් තිබෙනවා.
ඉරානයේ ගිනිකොනදිග ප්‍රදේශයේ සැඟවුණු ත්‍රස්තවාදී ඉලක්ක වෙත සිය ප්‍රහාර එල්ල කළ බවයි පාකිස්තානය ප්‍රකාශ කළේ.
කාන්තාවන් තිදෙනෙකු, පිරිමින් දෙදෙනෙකු සහ ළමුන් සිව් දෙනෙකු මෙම ප්‍රහාරවලින් මිය ගිය බව ඉරාන රාජ්‍ය රූපවාහිනිය සඳහන් කළා.
ඊශ්‍රායලය ගාසා තීරයේ පලස්තීන හමාස් කණ්ඩායමට එරෙහිව සටන් කරන අතර ලෙබනනය තුළ ඉරානයේ පිටුබලය ලබන හිස්බුල්ලා සංවිධානය සමඟ වෙඩි හුවමාරු කර ගනිමින් සිටිනවා.
ඉරාකයේ සහ සිරියාවේ, ඉරානයේ පිටුබලය ලබන කණ්ඩායම් එක්සත් ජනපද හමුදා ඉලක්ක කරමින් සිටින අතර එක්සත් ජනපදය සහ එක්සත් රාජධානිය යේමනයේ ඉරානයේ පිටුබලය ලබන හූතිවරුන්ට පහර දී තිබෙනවා.
පාකිස්තානය සහ ඉරානය තම දේශසීමාවේ ප්‍රදේශවලින් ප්‍රහාර එල්ල කරන සටන්කාමී කණ්ඩායම්වලට රැකවරණය ලබා දෙන බවටයි දිගු කලක් තිස්සේ එකිනෙකාට චෝදනා කරමින් සිටින්නේ.
බ්‍රහස්පතින්දා පාකිස්තාන විදේශ අමාත්‍යාංශය සිය ප්‍රහාර සනාථ කළ අතර ඉරාන මාධ්‍ය පැවසුවේ එය සරවන් නගරය අවට සිදු වූ බවයි.
පාකිස්තානයේ බලුකිස්තාන් පළාතේ ඉරාන දේශසීමා ආසන්නයේ පිහිටි ප්‍රදේශයකට ඉරාන ප්‍රහාරය එල්ලවූ අතර එම ප්‍රහාරය පාකිස්තානය දැඩි ලෙස හෙළා දැක තිබෙනවා.
ඉරානය අවධාරණය කලේ, සිය ප්‍රහාර එල්ල කරනු ලැබුවේ ඉරානයට ප්‍රහාර එල්ල කළ සුන්නි මුස්ලිම් කණ්ඩායමක් වන Jaish al-Adl වෙත මිස පකිස්තානයේ පුරවැසියන්ට නොවන බවයි.
