ප්‍රමාද වූ පෙට්‍රල් නැව අද මෙරටට – ඉන්ධන මිලත් යළි වැඩිවෙන ලකුණු

පෙට්‍රල් මෙට්‍රික් ටොන් 40,000ක් රැගත් නෞකාවක් අද (24) දිනයේ දී දිවයිනට ළඟාවීමට නියමිත ව තිබෙනවා.

අදාල ඉන්ධන නෞකාව ඊයේ (23) දිනයේ දී දිවයිනට ළඟාවීමට නියමිත ව තිබුණත් එය ප්‍රමාද වන බව බලශක්ති අමාත්‍ය කංචන විජේසේකර සිය ට්විටර් ගිණුමටපණිවුඩයක් නිකුත් කරමින් සඳහන් කළා.

මේ අතර වාහන අංක තහඩුවේ අවසන් අංකය අනුව බෙදා වෙන්කළ දිනයන් වලදී ඉන්ධන නිකුත් කිරීමේ යෝජනාවක් පසුගිය දා ඉදිරිපත් වී තිබෙනවා.

කෙසේ වෙතත් එම යෝජනාව ක්‍රියාත්මක කරන දිනය සම්බන්ධයෙන් තවමත් තීරණය ගෙන නැහැ.

මේ අතර අද (24) දිනය තුළදී ඉන්ධන මිලේ වැඩිවීමක් සිදුවිය හැකි බව මෙරට ජාතික පුවත් පත් කිහිපයක්ම වාර්තාකර තිබුණා.

ඉන්ධන මිල සූත්‍රයට අනුව මෙලෙස ඉන්ධන මිල ඉහළ යාමක් සිදුවනු ඇති බවයි ඒ අනුව වාර්තා වන්නේ.

ඒ අනුව ඔක්ටේන් 92 සහ 95 පෙට්‍රල් ලීටරයක මිල 70ත් 80ත් අතර මිලකින් සහ ඩීසල් සහ සුපර් ඩීසල් ලීටරයක මිල රුපියල් 50ත් 70ත් අතර මිලකින් ඉහළ දමනු ඇති බවයි තොරතුරු වාර්තා වුණේ.

මේ වනවිට ඔක්ටේන් 92 වර්ගයේ ඉන්ධන ලීටරයක මිල රුපියල් 420ක් වන අතර 95 වර්ගයේ පෙට්‍රල් ලීටරයක් රුපියල් 450ක්.

ඩීසල් ලීටරයක් රුපියල් 400 වන අතර සුපර් ඩීසල් ලීටරයක මිල රුපියල් 445ක් වනවා.