යුරෝපීය කොමිෂන් සභාවේ සේවය කරන කාර්ය මණ්ඩලයට TikTok යෙදවුම (App) ඔවුන්ගේ දුරකථන සහ ආයතනික උපාංගවලින් ඉවත් කරන ලෙස නියෝග කර තිබෙනවා.
එම කොමිසම පැවසුවේ දත්ත ආරක්ෂා කිරීම සහ සයිබර් ආරක්ෂණ වැඩි කිරීම සඳහා මෙම පියවර ක්‍රියාත්මක කරන බවයි.
ByteDance නම් චීන සමාගමකට අයත් TikTok, පරිශීලකයින්ගේ දත්ත ලබාගෙන ඒවා චීන රජයට ලබාදෙන බවට චෝදනා එල්ල වී තිබෙනවා.
කෙසේවෙතත් TikTok සමාගම අවධාරණය කරන්නේ එය අනෙකුත් සමාජ මාධ්‍ය කටයුතු කරන ආකාරයෙන් මිස ඊට වෙනස් ආකාරයකින් ක්‍රියාත්මක නොවන බවයි.
යුරෝපා සංගමයේ විධායක අංශය වන යුරෝපා සංගමයේ ආයතනික කළමනාකරණ මණ්ඩලය විසින් ආරක්ෂක හේතූන් මත මෙම තීරණය ගෙන ඇති බවයි යුරෝපා සංගම් ප්‍රකාශක සෝනියා ගොෂ්වා මහතා සඳහන් කළා.
මෙම තහනම යනුවෙන් අදහස් කර ඇත්තේ යුරෝපා කොමිෂන් සභාවේ කාර්ය මණ්ඩලයේ රාජකාරී කටයුතු සිදු කරනු ලබන පෞද්ගලික උපාංගවල ද TikTok භාවිතා කළ නොහැකි බවයි.
යුරෝපා කොමිෂන් සභාවේ කාර්ය මණ්ඩලයේ ස්ථිර හා කොන්ත්‍රාත් සේවකයින් 32,000ක් පමණ සිටින බව සඳහන්.
ඔවුන් සියලු දෙනා මාර්තු 15 වනදාට පෙර හැකි ඉක්මනින් තම දුරකථන ඇතුළු උපාංගවලින් ඔවුන් TikTok යෙදවුම ඉවත් කළ යුතුයි.
මේ අතර යුරෝපා කොමිෂන් සභාවේ මෙම තීරණය තම සමාගමේ සේවාවන් පිළිබඳ වැරදි අදහස් මත පදනම්ව ගනු ලැබූ තීරණයක් බව යි TikTok ප්‍රකාශ කර ඇත්තේ. එමෙන්ම මෙම තීරණය ගැන කලකිරීමට පත්වන බව ද ඔවුන් සඳහන් කර තිබෙනවා.
ජාතික ආරක්ෂක කටයුතු හේතුවෙන් ඇමරිකා එක්සත් ජනපද රජය ද පසුගිය වසරේදී ටික්ටොක් තහනම් කරනු ලැබුවා.
එක්සත් ජනපදයට බිය පළ කර තිබුණේ චීන රජයට TikTok හරහා තම උපාංගවලට සහ එක්සත් ජනපද පරිශීලක දත්ත වෙත ප්‍රවේශ විය හැකි බවටයි.
පසුගිය මාසයේ නෙදර්ලන්ත රජය ද මේ හා සමාන කරුණු දක්වමින් පිළිබඳ TikTok යෙදවුමෙන් ඉවත් වීමට රාජ්‍ය නිලධාරීන්ට උපදෙස් දී තිබුණා.
TikTok භාවිතය වේගයෙන් වර්ධනය වී ඇති අතර දත්තවලට අනුව ලොව පුරා බාගත කිරීම් (download) බිලියන තුනක් ඉක්ම වූ (meta) නොවන යෙදවුම එය ලෙසටයි සැලකෙන්නේ.
