පළාත් පාලන ආයතන ඡන්ද විමසීම් ආඥා පනතේ 262 වැනි අධිකාරියේ 26 වැනි වගන්තිය ප්‍රකාරව අම්පාර දිස්ත්‍රික්කයේ කල්මුනෙයි මහ නගර සභාව සහ දෙහිඅත්තකණ්ඩිය ප්‍රාදේශීය සභාව, මන්නාරම දිස්ත්‍රික්කයේ මන්නාරම ප්‍රාදේශීය සභාව, කිලිනොච්චිය දිස්ත්‍රික්කයේ පූනාකරි ප්‍රාදේශීය සභාව හා ගාල්ල දිස්ත්‍රික්කයේ ඇල්පිටිය ප්‍රාදේශීය සභාව හැර දිවයිනේ සෙසු සියලු ම පළාත් පාලන ආයතනවලට නගරාධිපති/ නියෝජ්‍ය නගරාධිපති, සභාපති සහ උප සභාපති මෙන් ම සභිකයින් තෝරා පත් කරගැනීමට අදාළ ඡන්ද විමසීම සඳහා නාම යෝජනා භාර ගැනීමේ දැන්වීම ගැන මැතිවරණ කොමිෂන් සභාව නිවේදනයක් නිකුත් කර තිබෙනවා.
එම නිවේදනයේ දැක්වෙන්නේ මාර්තු මස 03 වැනි දින සිට අදාළ සියලු ම පළාත් පාලන ආයතනවල ප්‍රසිද්ධ කර ඇති බවයි.
පිළිගත් දේශපාලන පක්ෂයක් හෝ ස්වාධීන කණ්ඩායමක් විසින් පළමු නාමයෝජනා පත්‍රයේ හා දෙවැනි නාමයෝජනා පත්‍රයේ නාමයෝජනා කළ යුතු අපේක්ෂකයින් ගණන් පළමු හා දෙවන නාමයෝජනා පත්‍රවලට ඇතුළත් විය යුතු අවම තරුණ හා කාන්තා අපේක්ෂකයින් ගණන හා පිළිගත් දේශපාලන පක්ෂයක් හෝ ස්වාධීන කණ්ඩායමක් විසින් තැන්පත් කළ යුතු ඇප මුදල් පිළිබඳ ව තොරතුරු අදාළ නාමයෝජනා දැන්වීමේ මෙන් ම ශ්‍රී ලංකා ප්‍රජාතාන්ත්‍රික සමාජවාදී ජනරජයේ අංක 2425/70 දරන හා 2025 මාර්තු 01 දිනැති අතිවිශේෂ ගැසට් පත්‍රයේ ද පළ කර ඇති බව මැතිවරණ කොමිෂන් සභාව සිය නිවේදනය මගින් දක්වා තිබෙනවා.
මැතිවරණ කොමිෂන් සභාවේ වෙබ් අඩවිය වන www.elections.gov.lk හි ද මෙම තොරතුරු ප්‍රසිද්ධ කර ඇති බවයි නිවේදනයේ වැඩිදුරටත් දැක්වෙන්නේ.
