ඉන්දීය ප්‍රිමියර් ලීග් තරගාවලියේ 11වන තරගයෙන් පන්ජාබ් කිංස් කණ්ඩායම පරදා ලකුණු 21ක ජයක් වාර්තා කිරීමට ලක්නව් සුපර් ජයන්ට්ස් කණ්ඩායම ඊයේ (30) දින රාත්‍රියේ සමත්වුණා.
එම තරගයේ කාසියේ වාසිය දිනූ ලක්නව් කණ්ඩායම තීරණය කළේ පළමුව පනදුවට පහර දීමටයි.
ඒ අනුව පිටියට පිවිසි ඔවුන් නියමිත පන්දුවාර 20 අවසානයේ කඩුළු 08ක් දැවී ලකුණු 199ක් ලබා ගත්තා.
එහිදී ක්වින්ටන් ඩී කොක් ලකුණු 58ක් පන්දු 38කින් රැස්කළ අතර නිකොලස් පුරාන් පන්දු 21 කින් වේගවත් ලකුණු 42ක් සහ කෘනල් පාන්ඩ්යා පන්දු 22 කින් ලකුණු 43ක් රැස්කළා.
පන්දු යැවීමේදී පන්ජාබ් කණ්ඩායම වෙනුවෙන් සෑම් කරන් ලකුණු 28කට දවාගත් කඩුළු සංඛ්‍යාව 03ක් .
මෙම තරගය ජය ගැනීම සදහා ලකුණු 200ක ඉලක්කයක් හඹා යාම සදහා පිටියට පිවිසි පන්ජාබ් කණ්ඩායමට නියමිත පන්දුවාර සංඛ්‍යාව අවසානයේ කඩුළු 05ක් දැවී ලබා ගත හැකිවුයේ ලකුණු 178ක් පමණයි.
එහිදී නායක ශිකර් ධවාන් පන්දු 50කින් ලකුණු 70ක් ද ,ජොනී බෙයාර්ස්ටෝව් පන්දු 29කින් ලකුණු 42ක් ලබා ගත්තා.
මායන්ක් යාදව් ලකුණු 27කට කඩුළු 03ක් දවා ගනිද්දී මොහ්සින් ඛාන් ද ලකුණු 34කට කඩුළු 02ක් දවා ගැනීමටයි සමත් වුණේ.
තරගයේ වීරයා වශයෙන් ලක්නව් කණ්ඩායමේ මායන්ක් යාදව් නම් කරනු ලැබුවා.
