නො කියා ම ගිය ප්‍රියා වෙනුවෙන් අවසන් ගෞරවයට විපක්ෂ නායක එයි – කලා තරු රැසකුත් ඒ අතර (වීඩියෝ)

මෙරට සම්මානිත කෘතහස්ත ප්‍රවීණ ගායන ශිල්පී ප්‍රියා සූරියසේන මහතාගේ අවසන් කටයුතු හෙට (27) පස්වරුවේ බොරැල්ල කනත්තේ දී සිදු කිරීමට නියමිතයි.

මෙම අසහාය ගායකයා දිගු කලක් රෝගාතුරව සිටි අතර; පෙරේදා (24) අලුයම කොළඹ ජාතික රෝහලේ දැඩි සත්කාර ඒකකයේ දී අප අතරින් සමුගත්තා.

අභාවප්‍රාප්ත වන විට ඒ මහතා පසුවූයේ 80 වැනි වියෙහියි.

එමෙන්ම අද (26) පස්වරු 02 සිට පස්වරු 04 තෙක් ජාතික ගුවන් විදුලි සංස්ථා පරිශ්‍රයේ මහජන ගෞරවය සඳහා දේහය තැන්පත් කිරීමට ද කටයුතු යොදා තිබෙනවා.

ඉන් අනතුරුව අද පස්වරු 06 සිට හෙට පස්වරු 03 තෙක් දේහය බොරැල්ල කනත්ත අසල පිහිටි ජයරත්න රෙස්පෙක්ට් ශාලා පරිශ්‍රයේ තැන්පත් කෙරෙනු ඇති.

සදා මතකයේ රැඳෙන නො මැකෙන ගීත ගණනාවක් රසිකයාට තිළිණ කළ ප්‍රියා සූරියසේන සූරින් හට අවසන් ගෞරව දැක්වීමට ඊයේ දිනයේ දී විවිධ දේශපාලන නායකයින්, ආගම් නායකයින් සේ ම මෙරට කලා තරු ද එක් ව සිටියා.

ඒ අතර විපක්ෂ නායක සජිත් ප්‍රේමදාස මහතා ද ප්‍රියා සූරියසේන මහතා වෙත අවසන් ගරුත්වය දැක්වීමට පැමිණියා.

මීට අමතරව ප්‍රවීණ ගායන ශිල්පී සුනිල් එදිරිසිංහ මහතා, පුන්සිරි සොයිසා, කරුණාරත්න දිවුල්ගනේ, චන්ද්‍රසේන හෙට්ටිආරච්චි, උරේෂා රවිහාරි ඇතුළු කලා තරු රැසක් ද එක් ව සිටි බවයි වාර්තා වන්නේ.