පොලිස් නිල සුනඛ අංශයේ රාජකාරි කටයුතු සඳහා යුක්තියේ මෙහෙයුමට සම්බන්ධ කර ගැනීම උදෙසා රුපියල් මිලියන 58 ක් වැයකර නෙදර්ලන්තයෙන් ගෙන එන ලද සුනඛයින් අතර සිටි ඉංග්ලිෂ් ස්පෑනියෙල් වර්ගයේ ගැහැණු සතෙකු මහනුවර නිල සුනඛ මූලස්ථානයේ දී (08) දා පැටවුන් 07 දෙනෙකු බිහිකර තිබෙනවා.
අප ප්රාදේශීය වාර්තාකරු පැවසුවේ; මෙම ස්පෑනියෙල් වර්ගයේ පැටවුන් හත්දෙනාගේ වටිනාකම රුපියල් කෝටියකට ආසන්න බවයි.
තවත් එක් ගැහුණු සත්ත්වයෙකු පැටවුන් බිහි කිරීමට ආසන්න තත්ත්වයේ පසුවන බවත් මෙම සියලුම සතුන් මාසයක කාලයක් සඳහා නිරෝධායනයට යොමුකර ඇති බවත් මෙම සුනඛයන් භාරව සිටින නිලධාරියකු සඳහන් කළා.
පැටවුන් හත්දෙනා සහ මව පශු වෛද්යවරුන්ගේ අධීක්ෂණය යටතේ පසුවන බවත් නිරෝධායන කාල සීමාව නිමා වන තුරු එම සත්ත්වයින් ආසන්නයට යාමට අවසර ලබා නොදෙන බවත් මේ සම්බන්ධයෙන් කළ විමසීමක දී පොලිස් නිල සුනඛ කොට්ඨාසයේ අධ්යක්ෂ ජ්යෙෂ්ඨ පොලිස් අධිකාරි කාංචන ගොඩකුඹුර ප්රකාශ කළා.
නෙදර්ලන්තයෙන් ආනයනය කරන ලද සුනඛයින් 35 දෙනා මාස 08-12 වයසේ පසුවන අතර මාසයක කාලයක් නිරෝධායනය කිරීමෙන් පසු ඔවුන් පුපුරණ ද්රව්ය පරීක්ෂණ, අපරාධ පරීක්ෂණ හා මත්ද්රව්ය වැටලීම් සම්බන්ධ පුහුණුවකට යොමුකර රාජකාරි කටයුතුවල යෙදවීමට නියමිත බවයි වාර්තා වන්නේ.
