යාපනය වෙත්තලකේනි, කදයිකාඩු, මාමුනෙයි සහ කුඩාරප්පු ප්රදේශයන්ට ඔබ්බෙන් වූ මුහුදු ප්රදේශයන්වල නාවික හමුදාව සිදු කළ විශේෂ මෙහෙයුම් මඟින් නීතී වීරෝධී ලෙස ධීවර කටයුතුවල නිරත වෙමින් සිටි පුද්ගලයින් 18 දෙනෙකු අත්අඩංගුවට ගෙන තිබෙනවා.
නීතී වීරෝධී ලෙස මුහුදු කූඩැල්ලන් ඇල්ලීම, වලංගු බලපත් රහිතව ධීවර කටයුතු සිදු කිරීම සහ බලපත් රහිතව අනුමත සීමාව ඉක්මවා කිමිදුම් උපකරණ තබා ගැනීම යන චෝදනා යටතේයි මෙම පිරිස අත්අඩංගුවට ගෙන ඇත්තේ.
සැකකරුවන් සමග මුහුදු කූඩැල්ලන් 669ක්, ඩිංගි යාත්රා 6ක්, කිමිදුම් උපකරණ හා නීති විරෝධී ධීවර ආම්පන්න ද නාවික හමුදා භාරයට ගෙන තිබෙනවා.
උතුරු නාවික විධානයට අයත් වෙත්තලකේනි නාවික ස්ථානගත කිරීම මඟිනුයි, යාපනය වෙත්තලකේනි, කදයිකාඩු, මාමුනෙයි සහ කුඩාරප්පු ප්රදේශයන්ට ඔබ්බෙන් වූ මුහුදු ප්රදේශයන්ගේ මෙම විශේෂ සෝදිසි මෙහෙයුම් සිදුකර ඇත්තේ.
මෙම මෙහෙයුම් මඟින් නාවික හමුදා භාරයට ගත් සැකකරුවන් වයස අවුරුදු 18 ත් 42 ත් අතර වයසේ පසුවන කල්පිටිය, මුල්ලියාන් සහ මන්නාරම යන ප්රදේශයන්හි පදිංචිකරුවන් බවට හඳුනාගෙන තිබෙනවා.
එම සැකකරුවන්, මුහුදු කූඩැල්ලන්, ඩිංගි යාත්රා, කිමිදුම් උපකරණ සහ නීති විරෝධී ධීවර ආම්පන්න ඉදිරි නීතිමය කටයුතු සඳහා යාපනය ධීවර හා ජලජ සම්පත් දෙපාර්තමේන්තු කාර්යාලය වෙත භාර දුන් බවයි නාවික හමුදාව ප්රකාශ කළේ.
