නීතිවිරෝධී ව මෙරට මුහුදු තීරයේ ධීවර කටයුතුවල නිරත වුණු පිරිසක් නාවික හමුදා භාරයට ගෙන තිබෙනවා.
නාවික හමුදා මාධ්‍ය අංශය නිවේදනයක් නිකුත් කරමින් සඳහන් කළේ; මෙම සිදුවීම යාපනය – කදෙයිකාඩු ප්‍රදේශයට ඔබ්බෙන් වූ මුහුදු ප්‍රදේශයේ දී ඊයේ (12) සිදු ව ඇති බවයි.
තහනම් දැල් භාවිතයෙන් සහ නීතිවිරෝධී ලෙස විදුලි ආලෝක ධාරා භාවිතයෙන් ධීවර කටයුතු සිදු කරමින් සිටි පුද්ගලයින් 16 දෙනෙකු සමග ඩිංගි යාත්‍රා අටක් සහ නීතිවිරෝධී ධීවර ආම්පන්න නාවික හමුදා භාරයට ගැනීමට කටයුතු කෙරුණා.
මෙරටට අයත් මුහුද සහ වෙරළ කලාපය ඔස්සේ සිදු කෙරෙන නීතිවිරෝධී ධීවර කටයුතු මැඩපවත්වා, නීත්‍යානුකූල ධීවර කටයුතු ප්‍රවර්ධනය කිරීම වෙනුවෙන් නාවික හමුදාව නිරන්තර අවධානයෙන් සිටිමින් මෙම මෙහෙයුම් ක්‍රියාත්මක කරනවා.
උතුරු නාවික විධානයේ වෙත්තලකේනී නාවික ස්ථානගත කිරීමට අයත් චුන්ඩිකුලම් නාවික අනුඛණ්ඩය මගිනුයි මෙම විශේෂ මෙහෙයුම සිදු කර ඇත්තේ.
නාවික හමුදා භාරයට ගත් සැකකරුවන් අවුරුදු 18 ත් 53 ත් අතර වයසේ පසුවන මුල්ලියාන් සහ මීගමුව යන ප්‍රදේශයන්හි පදිංචිකරුවන් බවට හඳුනාගෙන තිබෙනවා.
ඉදිරි නීතිමය කටයුතු සඳහා යාපනය ධීවර හා ජලජ සම්පත් දෙපාර්තමේන්තු කාර්යාලය වෙත අදාළ සැකකරුවන් භාරදීමට කටයුතු කර ඇති බවත් නාවික හමුදා මාධ්‍ය අංශය නිකුත් කළ නිවේදනයේ වැඩිදුරටත් සඳහන්.
