වසර එකහමාරකට පමණ පසුව නැවත ජාත්‍යන්තර පන්දුවාර 20 -20 ක්‍රිකට් පිටියට පිවිසීමට ඉන්දීය සුපිරි වේග පන්දු ක්‍රීඩක මොහොමඩ් ෂාමිට හැකි ව තිබෙනවා.
දණහිසේ පවතින ආබාධයක් හේතුවෙන් ෂාමි වරින් වර සැත්කම්වලට භාජනය වූ ඔහු 2023 වසරේ පැවති එක්දින ක්‍රිකට් ලෝක කුසලාන තරගාවලියෙන් පසුව කිසිදු ජාත්‍යන්තර තරගයකට ක්‍රීඩා කර නැහැ.
ෂාමිගේ පැමිණීම බොහෝ දෙනෙකුගේ අවධානය දිනාගෙන ඇති අතර ඉන්දීය මාධ්‍ය වාර්තා කළේ එළඹෙන 22 වැනි දා එංගලන්තයට එරෙහිව ඇරඹෙන පන්දුවාර 20 ක්‍රිකට් තරගාවලියට මොහොමඩ් ෂාමි එක් කිරීමට නියමිත ව ඇති බවයි.
ඒ අනුව ඊයේ දිනයේ දී කොල්කටා හි ඊඩ්න් ගාර්ඩ්න්ස් හි දී පැවති ඉන්දීය කණ්ඩායමේ පළමු පුහුණු සැසියේ දී ෂාමිගේ පන්දු යැවීම නිරීක්ෂණයට ලක් වූ බවයි වාර්තා වන්නේ.
පන්දු යැවීමේ පුහුණුකරු මෝර්න් මෝකල් ෂාමිගේ පන්දු යැවීමේ ප්‍රගතිය හොඳින් නිරීක්ෂණය කළ බවත් වාර්තා වනවා.
