නිශාන්ත වික්‍රමසිංහට අධිකරණයෙන් ඇප නියම වෙයි (වීඩියෝ)

දූෂණ චෝදනා ත්‍රිත්වයක් සම්බන්ධයෙන් සිදු කරගෙන යනු ලබන විමර්ශන කටයුතුවලට අදාළව අල්ලස් කොමිසම විසින් අත්අඩංගුවට ගෙන රක්ෂිත බන්ධනාගාරගතව සිටි ශ්‍රී ලංකන් ගුවන් සේවා සමාගමේ හිටපු සභාපති ඇන්තනි නිශාන්ත වික්‍රමසිංහ ඇප මත මුදා හැරීමට කොළඹ ප්‍රධාන මහේස්ත්‍රාත් තනූජා ලක්මාල් මහත්මිය අද (15) නියෝග කළා.

සැකකරුට මිලියන පහ බැගින් වූ ශරීර ඇප තුනක් සහ රුපියල් පනස්දාහක මුදල් ඇපයක් නියම කෙරුණා.

සිද්ධියට අදාළ සැකකරුගේ විදේශ ගමන් තහනම් කරන ලෙසට ද මහේස්ත්‍රාත්වරිය නියෝග කළා.

සිද්ධියට අදාළ සැකකරු අද උදෑසනබන්ධනාගාර නිලධාරීන් විසින් ඉදිරිපත් කිරීමෙන් අනතුරුව ඇප මත මුදා හරිනු ලැබුවා.

2025,06.27 වන දින නාවල ප්‍රදේශයේ දී අල්ලස් හෝ දුෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් සිද්ධියට අදාළ සැකකරු අත්අඩංගුවට ගත්තා.

සිද්ධියට අදාළ සැකකරුට චෝදනා තුනක් යටතේ නඩු පවරා තිබෙන බව අල්ලස් කොමිසම වෙනුවෙන් අධිකරණයේ පෙනී සිටි නිලධාරීන් සඳහන් කරනු ලැබුවා.

සිද්ධියට අදාළ විමර්ශනය කටයුතු බොහෝ දුරට අවසන් බැවින් සුදුසු නියෝගයක් ලබා දෙන ලෙස අල්ලස් කොමිසම වෙනුවෙන් අධිකරණයේ පෙනී සිට නිලධාරීන් වැඩිදුරටත් අධිකරණයට කරුණුු දැක්වුවා.

2014.01.22 වන දින මැලේසියාවේ ක්වාලාලම්පූර් සිට කටුනායක දක්වා පියාසර කිරීමට නියමිතව තිබූ අංක UL319 දරන ගුවන් යානයේ ගමනාන්තය වෙනස් කිරීම මඟින් රජයට ඇ.ඩො. 4512 ක් පාඩු කිරීම පළමුවන චෝදනාව වනවන අතර 2014.01.26 වන දින මාලදිවයිනේ සිට ලංකාවට පැමිණ ප්‍රංශය බලා පිටව යාමට සිටි මගින් 75 දෙනෙකු අංක UL563 දරන ගුවන් යානයෙන් පිටත් කර හැරීම මඟින් ඇ.ඩො. 19,160 ක් රජයට පාඩු කිරීම දෙවන චෝදනාව වනවා.

2014.12.19 වන දින කටුනායක 18 කණුව ක්‍රීඩාංගණයේ පැවති හිටපු ජනාධිපතිවරයාගේ මැතිවරණ ප්‍රචාරක කටයුතු වෙනුවෙන් රජයේ මුදල් 1,250,000/- වියදම් කිරීම යන චෝදනා තුන යටතේ නඩු පවරා තිබුණා.

සැකකරු වෙනුවෙන් අධිකරණය පෙනී සිටි නීතීඥ සජිත ජයවර්ධන සහ අසේල රැකවල මහතා කරුණු දක්වමින් පවසා සිටියේ, සිය සේවාදායකයා වයස අවුරුදු අසූවක වයෝවෘද්ධ පුද්ගලයෙක් බවයි.

“ස්වාමීනී මගේ සේවාදායකට බෙහෙත් ටිකක් ගන්නවත් ගෙදරින් තනියෙන් එළියට යන්න බැහැ ඔහුගේ පුතා සහ ලේලි තමයි ඔහුට අවශ්‍ය සියලු දේ කරන්නේ, එතකොට මගේ සේවාදායකයාට මතකය පවා දැන් නැහැ, ඔහු මේ සිද්ධිය සම්බන්ධව ප්‍රකාශ ලබා දී තිබෙන්නේ විමර්ශනය ආරම්භ වූ මුල් කාලයේ ලබා දුන් ඔහු ලබා දුන් දිවුරුම් ප්‍රකාශ බලලා, ස්වාමීනී මගේ සේවාදායකයා වකුගඩු හෘදයාබාධ සහිත රෝගී තත්ත්වය පසු අයෙක්. ඒ නිසා සුදුසු ඇප කොන්දේසියක් මත ඇප ලබා දෙන ලෙස මම අධිකරණයෙන් ඉල්ලනවා.”

දෙපාර්ශ්වයම ඉදිරිපත් වූ කරුණු සලකා බැලූ මහේස්ත්‍රාත්වරිය සිද්ධියට අදාළ සැකකරු ඇප මත මුදා හරින ලෙසට නියෝග කළා.