ගෙළ වැළලාගෙන මියගිය බවට සැක කෙරෙන 15 හැවිරිදි පාසැල් සිසුවකුගේ මළ සිරුරක් පලාගල නාරංගස්වැව ප්රදේශයේ නිවසකින් හමුවීම පිළිබඳ පොලිස් පරීක්ෂණ ආරම්භ වී තිබෙනවා.
ඔහු පදිංචි නිවසේ කාමරයක සිසුවා නිදා ගත් බව කියන ඇඳට ඉහළින් වහලයේ එල්ලෙමින් තිබියදීයි අද පස්වරුවේ මෙම මළ සිරුර හමුවී ඇත්තේ.
සහෝදර සහෝදරියන් 4 දෙනෙකුගෙන් යුත් පවුලේ බාලයා ද වන සිසුවාගේ මළ සිරුරේ ස්ථාන කිහිපයක සීරුම් තුවාල කිහිපයක් ද දක්නට ලැබෙන බව සඳහන්.
පොලිසිය සිදු කළ සෝදිසියේදී මිය ගිය සිසුවාගේ නිදන ඇඳේ මෙට්ටය යට තිබී මත් දුම් කුඩු විශේෂයක්, ගිනි පෙට්ටි, දුරකතන සිම්පත් කිහිපයක්, ජංගම දුරකතන දෙකක් සොයාගෙන තිබෙනවා.
පොලිසිය ඉදිරි විමර්ශණ කටයුතු සඳහා ඒවා සිය භාරයට ගෙන ඇති බවයි අප වාර්තාකරු සඳහන් කළේ.
මෙම මරණය සම්බන්ධයෙන් මහේස්ත්රාත් පරීක්ෂණයෙන් පසු කැකිරාව වැඩබලන මහේස්ත්රාත් පොලිසියට නියෝග කළේ සිසුවාගේ මළ සිරුර සම්බන්ධයෙන් පශ්චාත් මරණ පරීක්ෂණයක් පැවැත්විය යුතු බවයි.
ඒ සඳහා සිරුර දඹුල්ල මහ රෝහලේ අධිකරණ වෛද්ය නිලධාරීවරයා වෙත යොමු කිරීමට ද මහේස්ත්රාත්වරයා නියෝග කරනු ලැබුවා.
පශ්චාත් මරණ පරීක්ෂණය හෙට (10) දඹුල්ල මහ රෝහලේදී පැවැත්වීමට නියමිතයි. ගිරානේගම පොලිසිය සිද්ධිය සම්බන්ධයෙන් වැඩිදුර විමර්ශණ සිදු කරනවා.
