නිදහස් පක්ෂයෙන් තීන්දුවක්

වත්මන් ආණ්ඩුව සමග ශ්‍රී ලංකා නිදහස් පක්ෂයට මින් ඉදිරියට කිසිඳු ගනුදෙනුවක් නොමැති බව හිටපු ජනාධිපති මෛත්‍රීපාල සිරිසේන මහතා පවසයි.

අද (12) කොළඹ දිස්ත්‍රික් ආසන සංවිධායකවරුන් අමතමින් ඔහු ඒ බව පැවසීය.

“ශාන්ත බණ්ඩාර සිය දේශපාලන ජීවිතයේ සියදිවි නසා ගත්තා කියලයි මම විශ්වාස කරන්නේ. ඔහු  කියනවාලු මට කියලා ගියේ කියලා. මට කෝල් කරලාවත් කිව්වේ නැහැ. අපි අද ආණ්ඩුවේ මන්ත්‍රීවරු නෙමේ. විපක්ෂයේ කණ්ඩායමකුත් නෙමේ. අපි ස්වාධීනවයි අදහස් ප්‍රකාශ කරන්නේ. ජනතාව ආවේගශීලිවීම පිළිබඳව ආණ්ඩුවට ප්‍රශ්නයක් නැහැ.. පාර්ලිමේන්තුවේ එයාලගේ සංඛ්‍යාව වැඩි නිසා.. මේ තියෙන ප්‍රශ්න එකක්වත් ප්‍රශ්න නෙමෙයි විදිහට තමයි කතා කරන්නේ. ජනතාවගේ ප්‍රශ්න කතා කරන්නේ නැහැ. මේ තත්ත්වය තුළ අපි ආණ්ඩුවත් එක්ක යළි ගනුදෙනු කරන්නේ නැහැ. ලියුම් ලියලා සාකච්ඡා කරලා සියල්ල ඉවරයි. පාරට බැහැලා රාජපක්ෂ පාලනය එපා කියන ජනතාවත් එක්කයි ශ්‍රීලනිපය ඉන්නේ.”

එම හමුව ඇමතූ පක්ෂ මහලේකම් දයාසිරි ජයසේකර මහතා සඳහන් කළේ රාජපක්ෂ පාලනයක් ඉදිරියටද පවතින්නේ නම් එම ආණ්ඩුවට එරෙහිව හෙට සිට ශ්‍රී ලංකා නිදහස් පක්ෂයද විරෝධය නියැලෙන බවය.

“සජිත් හිටපු ජනපති හමුවෙන්න ආවා. රාජපක්ෂ පවුලේ කිසිදු කෙනෙක් කැබිනට් මණ්ඩලයේ ඉන්න බැහැ. අගමැති මහින්ද නම් තනතුරු භාරගන්නේ නැහැ. අද රාත්‍රී 7ට රැස්වීමක් තියෙද්දි ජනපති ඊයේ ශාන්ත බණ්ඩාරට ඇමතිකමක් දෙනවා. පුරුදු සෙල්ලමම රාජපක්ෂලා නැවත පටන් අරන්. පාරවල්වලින් හොරාකාපු සල්ලිවලින් මන්ත්‍රීවරු මිලදී ගන්නවා. ශාන්ත බණ්ඩාරට කීයක් දුන්නාද දන්නේ නැහැ. වටිනාකමක් සහිතව ගිහින් තියෙන්නේ. මේ ජනපති මෙහෙම කරයි කියලා හිතුවේ නැහැ. හිටපු රාජපක්ෂලා පක්ෂ දෙකට තුනට කැඩුවා. ජරාජීරණ දේශපාලනය ගෝඨාභය රාජපක්ෂත් කරනවා. මන්ත්‍රිවරුන් මිලදී ගෙන 113 හදලා හෙට ඉඳලා ජනතාවට මුහුණ දෙන්න බැහැ. ආණ්ඩුවට එරෙහිව අපි එළියට බහිනවා. නැවත රාජපක්ෂලා එක්ක ආණ්ඩු හදනවා නම් රටවල්වලට උදව් කරන්න ඉඩ තියන්නේ නැහැ. නින්දිත ආණ්ඩුව සමඟ නැවත ගනුදෙනු නැහැ.