නැඟී එන කණ්ඩායම් අතර පැවැත්වෙන ආසියානු කුසලාන එක්දින තරගාවලියේ අවසන් පූර්ව තරගයක් ඊයේ (21) කොළඹ ආර්.ප්‍රේමදාස ක්‍රීඩාංගණයේ දී පැවැත් වුණා.
මෙම තරගය පැවැත් වුණේ ඉන්දීය නැඟී එන කණ්ඩායම සහ බංග්ලාදේශ නැඟී එන කණ්ඩායම අතරයි.
තියුණු මුහුණුවරක් ගත් මෙම තරගය ඉන්දියාව ජය ගත්තේ බංග්ලාදේශ කණ්ඩායම ලකුණු 51කින් පරාජය කරමින්.
මෙහිදී බංග්ලාදේශ පිළිතුරු ඉනිමේ දී දෙපිළේ ක්‍රීඩකයින් අතර උණුසුම් තත්ත්වයක් හටගත් අතර එය පාලනය කිරීම සඳහා විනිසුරුවරුන්ට මැදිහත් වීමට සිදු වුණා.
බංග්ලාදේශ පිතිකරු සෞම්‍ය සර්කාර් දවාගැනීමට නිකින් ජෝස් රැකගත් විශිෂ්ඨ පන්දුවත් සමඟ මෙම උණුසුම් වාදය ඇති වුණා.
එම උඩ පන්දුව නීත්‍යානුකූල උඩපන්දුවක් ද යන්න පිළිබඳව සර්කාර්ට විශ්වාසයක් නොතිබූ අතර, එය තහවුරු කිරීම සඳහා පිටිය තුළ රැඳී සිටීමට ඔහු තීරණය කළා.
එම අවස්ථාවේ දී ප්‍රීති ඝෝෂා නඟමින් සිටි ඉන්දීය ක්‍රීඩකයින් කිහිපදෙනෙකු ඔහුට පිටියෙන් පිටතට යන ලෙස සංඥා කළ අතර එහිදී දෙපිළේ ක්‍රීඩකයින් අතර කිසියම් වචන හුවමාරුවක් සිදුවන ආකාර දැකගත හැකි වුණා.
