පසුගියදා නාසා අභ්‍යවකාශ මධ්‍යස්ථානය මගින් අත්හදා බැලුණු යානය සූර්යයාගේ සමීපයට ම ළඟා වී තිබෙනවා.
විදෙස් මාධ්‍ය වාර්තා කළේ; එම යානාව ඉතිහාසගත වන්නේ සූර්යයා ආසන්නයට ම ගොස් නිරුපද්‍රිතව සිටීමට සමත් වූ එක යානාව ලෙසට බවයි.
“Parker Solar Probe” නමැති මෙම අභ්‍යවකාශ නිරීක්ෂණ යානයෙන් අද (05:00 GMT) විද්‍යාඥයින් දින කිහිපයක් අපේක්ෂාවෙන් සිටි සංඥා ලැබී තිබෙන බවත් බීබීසී පුවත් සේවය වාර්තා කළා.
දින කිහිපයක් ඉන් සංඥා නොලැබී තිබුණු හෙයින් එය සූර්යයාගේ අධික උෂ්ණත්වයට විනාශ වූවා දැයි යන සැකය මතු වී තිබුණු බවත් වාර්තා වුණා.
මෙම යානය සූර්යයාට ළඟා වී ඇත්තේ සූර්යයාගේ මතුපිට පෘෂ්ඨයේ සිට සැතපුම් මිලියන 3.8ක් නැතහොත් කිලෝමීටර් මිලියන 6.1කට බව නාසා ආයතනය තහවුරු කළා.
මෙම යානයට පැයට සැතපුම් 430,000ක (පැ.කි.මී. 692,000) වේගයෙන් ගමන් කළ හැකි බවත්, 1,800F (980C)ක උෂ්ණත්වයකට ඔරොත්තු දීමේ හැකියාවක් ඇති බවත් නාසා ආයතනය පවසනවා.
