ශ්‍රී ලංකා නාවික හමුදාව අද උදෑසන ශ්‍රී ලංකා මුහුදු තීරයේ සිදුකළ මෙහෙයුමක දී ඉන්දීය ධීවර යාත්‍රාවක් අනතුරට ලක්ව තිබෙනවා.
මෙම අනතුරින් ධීවර යාත්‍රාවේ සිටි ඉන්දීය ධීවරයෙක් ජීවිතක්ෂයට පත්ව තවත් ධීවරයෙක් අතුරුදන්ව ඇති බවයි නාවික හමුදා මාධ්‍ය අධ්‍යක්ෂක කපිතාන් ගයාන් වික්‍රමසූරිය පැවසුවේ.
ශ්‍රී ලංකා මුහුදු තීරයට අනවසරයෙන් ඇතුල් වී ධීවර කටයුතු සිදුකරන ඉන්දීය ධීවරයින් අත්අඩංගුවට ගැනීමේ මෙහෙයුමක් අද උදෑසන ශ්‍රී ලංකා නාවික හමුදාව විසින් ක්‍රියාත්මක කර තිබෙනවා.
මෙම මෙහෙයුම අතර තුර ඉන්දීය ධීවර යාත්‍රාවක් පළා යෑමට උත්සාහ කර ඇති අතර, එම අවස්ථාවේ දී අදාළ යාත්‍රාව පෙරළීමෙන් අනතුර ලක්ව ඇති බවයි වාර්තා වුණේ.
එම අවස්ථාවේ දී වහාම ක්‍රියාත්මක වූ නාවික හමුදාව ධීවර යාත්‍රාවේ සිටි ඉන්දීය ධීවරයින් සිව්දෙනාගෙන් තිදෙනෙක් බේරාගැනීමට හැකි වූ බවයි නාවික හමුදා මාධ්‍ය අධ්‍යක්ෂක කපිතාන් ගයාන් වික්‍රමසූරිය සඳහන් කළේ.
බේරාගැනුණු ධීවරයින් තිදෙනාගෙන් එක් ධීවරයෙක් රෝහල් ගත කිරීමේ දී ජීවිතක්ෂයට පත්ව ඇති අතර, අතුරුදන් වූ ධීවරයා සොයා තව දුරටත් මෙහෙයුම් ක්‍රියාත්මකයි.
