නාවලපිටිය සුපිරි වෙළද සංකීරණයේ දෙවන මහලේ පවත්වා ගෙන ගිය රන් භාණ්ඩ අලෙවි හා රන් උකස් මධ්‍යස්ථානයක් බිඳ එහි රන් භාණ්ඩ හා උපකරණ සොරාගත් සැකකරුවෙක් සහ ඊට අනුබල දුන් පුද්ගලයින් දෙදෙනෙකු නාවලපිටිය පොලිසිය මඟින් අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇති ප්‍රධාන සැකකරු කහටගස්දිගිලිය පොලිසියේ ලියාපදිංචි අපරාධකරුවන්ගේ නාම ලේඛනයට ඇතුළත් සැකකරුවෙක් බවයි වාර්තා වන්නේ.
මොහු විසින් සොරාගෙන ඇති අභරණ සහ භාණ්ඩ තොගයේ වටිනාකම රුපියල් ලක්ෂ 35කට අධික බවයි පැවසෙන්නේ.
සැකකරු මිතුරෙකු සමඟ එක්ව සොරාගන්නා ලද රන් භාණ්ඩ කහටගස්දිගිලිය, මිහින්තලේ, මහනුවර, ගම්පොළ, ගිනිගත්හේන සහ නාවලපිටිය නගරවල පිහිටි උකස් මධ්‍යස්ථානවල උකසට තබා මුදල් ලබාගෙන ඇති බව පොලිසිය පවසනවා.
එම මුදල්වලින් රුපියල් ලක්ෂ 05ක් පමණ වටිනා යතුරුපැදියක් ද මිල දී ගෙන ඇති බවයි පොලිසිය සඳහන් කළේ.
මෙම සොරකම සම්බන්ධයෙන් සිදුකළ පුළුල් විමර්ශනවල දී සැකකරුවන් හඳුනාගැනීමට හැකි වූ බවත්, පසුගිය මාස තුන තුළ නාවලපිටිය නගරයේ විවිධ ස්ථානවල සිදු වූ සොරකම් ගණනාවකට ප්‍රධාන සැකකරු සහ දෙවන සැකකරු අතර සම්බන්ධතාවක් ඇති බවත් අනාවරණය වී තිබෙනවා.
නාවලපිටිය පොලිසිය මේ සම්බන්ධයෙන් වැඩිදුර විමර්ශන සිදුකරනු ලබනවා.
