කොරෝනා වසංගතය හේතුවෙන් සංචාරණ සීමා පනවා තිබියදී ධාවනයෙන් ඉවත්ව නිවසක් ඉදිරිපිට නවතා තිබූ රුපියල් ලක්ෂ හතලිස් පහකට අධික වටිනාකමකින් යුත් පෞද්ගලික බස් රථයක් සොරාගෙන තිබෙනවා
පසුව එය කැබලි කර කොටස් අලෙවිකිරීමෙන් පසු මත්ද්රව්ය පානය කළ පුද්ගලයකු කිරුලපන පොලීසිය විසින් බොරැල්ල ටී 20 ප්රදේශයේදී අත්අඩංගුවට ගෙන තිබෙන බව වාර්තා වනවා
අත්අඩංගුවට පත් සැකකරු පොතුහැර ප්රදේශයේ පදිංචි 30 හැවිරිදි පුද්ගලයෙකු වන අතර මත්ද්රව්ය පානයට තදින් ඇබ්බැහි වූවකු බවයි පොලිසිය පවසන්නේ
සිද්ධිය සම්බන්ධයෙන් පොලිසිය සිදුකළ විමර්ශනවලදී සැකකරු පොතුහැර ප්රදේශයෙන් මීට පෙර ටිපර් රථයක් හා ත්රිරෝද රථයක් සොරකම් කිරීමේ සිද්ධියක් සම්බන්ධයෙන් වසර හතක් බන්ධනාගාරගතව සිට නිදහස්ව ආ අයෙකු වන බවත් වයස අවුරුදු 16 දී පළමු සොරකම සිදුකර අධිකරණයෙන් දඬුවම ලැබූ අයෙකු බව ද අනාවරණය කරගෙන තිබෙනවා
පවතින කොරෝනා වසංගතය හේතුවෙන් පොදු ප්රවාහන සේවාව මේ වන විට නවතා දැමීම නිසා මාර්ග අංක 103 කොටුව – නාරාහේන්පිට මාර්ගයේ ධාවනය වන මෙම බස්රථය කිරුළපන බේස්ලයින් මාර්ගයේ නිවසක් ඉදිරිපිට නවතා තිබියදී සොරාගෙන ගොස් ඇති බවට කිරුලපන පොලීසියට ලද පැමිණිල්ලකට අනුවයි පරීක්ෂණ ආරම්භ කර තිබෙන්නේ
පොලිස් නිලධාරීන් බස් රථය කිරුළපන සිට පෑලියගොඩ ප්රදේශය දක්වා රැගෙන ගොස් ඇති බවට මාර්ගය දෙපස සවිකර තිබූ ආරක්ෂිත කැමරා පරික්ෂා කිරීමේ දී තොරතුරු අනාවරණය කරගෙන තිබෙනවා
අනතුරුව පෑලියගොඩ අවට පරීක්ෂා කිරීමේදී නවලෝක ක්රීඩාංගණය අසල නවතා තිබූ බස් රථය සොයාගනු ලැබූ අතර ඒ වන විටත් බස්රථයේ අතිරේක ටයරය, බැටරි දෙකක් සහ කාපට් කට්ටලය අස්ථානගතව තිබු බවයි පොලිසිය පවසන්නේ
තවදුරටත් ආරක්ෂිත කැමරා නිරීක්ෂණය කිරීමේදී බස් රථය සොරකම් කළ පුද්ගලයා මීට වසර තුනකට පෙර බස් එම බස් රථයේම සේවය කළ කොන්දොස්තරවරයෙකු බවට බස්රථ හිමිකරු හඳුනා ගත් බවත් පසුව සැකකරුගෙන් ලද තොරතුරකට අනුව බස් රථයෙන් සොරාගෙන අලෙවි කර තිබූ අමතර කොටස් පෑලියගොඩ ප්රදේශයේ ස්ථාන දෙකකින් සොයාගෙන තිබෙන බවත් වාර්තා වනවා
