එළඹෙන ජනාධිපතිවරණයට අදාළ ව සිදු කෙරෙන නාම යෝජනා භාරදීම අනිද්දා; එනම් අගෝස්තු මස 15 වැනි දින පෙරවරු 09 සිට 11 දක්වා පැවැත්වීමට මැතිවරණ කොමිෂන් සභාව කටයුතු සූදානම් කර ඇති බැවින්; ඊට පොලිස් නිලධාරීන් දහසක් සේවයේ යෙදවීමට තීරණය කර තිබෙනවා.
නාම යෝජනා භාරදෙන දිනයේ දී ආධාරකරුවන් විශාල ප්‍රමාණයක් එනු ඇතැයි අපේක්ෂා කරන හෙයින්; එදිනට විශේෂ රථ වාහන සැලැස්මක් ද ක්‍රියාත්මක කිරීමට කටයුතු යොදා ඇති බවයි වැඩ බලන පොලිස් මාධ්‍ය ප්‍රකාශක; නියෝජ්‍ය පොලිස්පති රුවන් ගුණසේකර මහතා අද (13) පැවති විශේෂ සාකච්ඡාවකට එක් වෙමින් සඳහන් කළේ.
මේ අතර මැතිවරණ සමයේදී හදිසි ආපදා තත්ත්වයකට මුහුණදීමට සිදු වුවහොත් ජනතාවට සහන සැලසීමට විශේෂ ආපදා ඒකකයක් පිහිටුවීමට ද අද තීරණය කෙරුණා.
ජනාධිපතිවරණයට අදාළ ව නාම යෝජනා භාර දීම එළඹෙන අගෝස්තු මස 15 වැනිදා සිදු කෙරෙනවා.
පෙරවරු 09 සිට පෙරවරු 11 තෙක් අදාළ නාම යෝජනා භාර දීම සිදු කෙරෙන්නේ මැතිවරණ කොමිෂන් සභාවේදීයි.
ඒ සඳහා අවශ්‍ය ආරක්ෂාව යොදවන ආකාරය සම්බන්ධයෙන් වැඩ බලන පොලිස් මාධ්‍ය ප්‍රකාශක නියෝජ්‍ය පොලිස්පති රුවන් ගුණසේකර මහතා අදහස් දැක්වුවා.
මේ අතර ජනාධිපතිවරණ සමයේ දී ආපදා තත්ත්වයක් ඇතිවුවහොත් ඒ පිළිබඳව කටයුතු කරන ආකාරය පිළිබඳව ද අද සාකච්ඡාවක් ආපදා කළමනාකරණ අමාත්‍යාංශයේ දී පැවැත්වුණා.
ආරක්ෂක රාජ්‍ය අමාත්‍යවරයාගේ ප්‍රධානත්වයෙන් සහ ආරක්ෂක ලේකම් ජෙනරල් කමල් ගුණරත්න ඇතුළු ආරක්ෂක ප්‍රධානීන් මෙම සාකච්ඡාවට එක් ව සිටියා.
මැතිවරණ සමයේ දී හදිසි ආපදා තත්ත්වයක් ඇති වුවහොත් සහන ලබාගැනීමට 117 යන හදිසි ඇමතුම් අංකය සමගින් ජනතාව සම්බන්ධ කිරීමට ද මෙහිදී තීරණය කෙරුණා.
මෙම විශේෂ මාධ්‍ය සාකච්ඡාවට යුද හමුදාපති මේජර් ජෙනරල් විකුම් ලියනගේ, ගුවන් හමුදාපති එයාර් මාර්ෂල් උදේනි රාජපක්ෂ,
නාවික හමුදාපති වයිස් අද්මිරාල් ප්‍රියන්ත පෙරේරා, ආරක්ෂක මාණ්ඩලික ප්‍රධානී මේජර් ජෙනරාල් ශවේන්ද්‍ර සිල්වා ඇතුළු ආරක්ෂක ප්‍රධානීන් පිරිසක් එක් ව සිටියා.
