නළ ළිං කුහරයකට වැටී ඒ තුළ සිරවී සිටින වයස අවුරුදු 03ක කුඩා දරුවෙක් මුදවා ගැනීමට මේ වනවිට මෙහෙයුමක් ආරම්භ කර ඇති බව ඉන්දීය මාධ්‍ය වාර්තා කරනවා.
ඉන්දියාවේ බිහාර් ප්‍රාන්තයේ නාලන්දා හි කුල් ගම්මානයේ ජීවත් වූ දරුවෙක් මෙලෙස නළ ළිං කුහරයකට වැටී ඇති බවයි වාර්තා වන්නේ.
ශිවම් කුමාර් නැමැති මෙම දරුවා තවත් දරුවන් පිරිසක් සමඟ සෙල්ලම් කරමින් සිටිය දී කලකට පෙර හාරා තිබූ අනාරක්ෂිත නළ ළිං කුහරයකට මෙලෙස ඇද වැටී තිබෙනවා.
එම අවස්ථාවේ දරුවා සමඟ සෙල්ලම් කරමින් සිටි අනෙක් ළමුන් සිද්ධිය පිළිබඳව දරුවාගේ මව්පියන් දැනුවත් කිරීමටයි කටයුතු කර ඇත්තේ.
ඉන් අනතුරුව දරුවා මුදාගැනීමේ මෙහෙයුම් ආරම්භ කර ඇති අතර, මේ මොහොත වනවිටත් එම මෙහෙයුම් ක්‍රියාත්මකයි.
මෙහෙයුමට සම්බන්ධ වී සිටින මුදවාගැනීමේ නිලධාරී පැවසුවේ දරුවා තවමත් ජීවතුන් අතර සිටින බවත්, ඔහුගේ කට හඬ ඔවුන්ට ඇසෙන බවයි.
ප්‍රදේශයේ ගොවියෙකු විසින් හාරා ඇති මෙම නළ ළිඳ භාවිතයට ගැනීමෙන් පසුව අතහැර දමා ඇති අතර, එය වසා දැමීමට ඔහු කටයුතු කර නැහැ.
මෙවැනි ආකාරයේ අනාරක්ෂිත නළ ළිං තුළ සිරවීමෙන් ඉන්දියාවේ කුඩා දරුවන් කිහිප දෙනෙක්ම ජීවිතක්ෂයට පත් වූ සිදුවීම් පසුගිය කාලයේ වාර්තා වුණා.
