එළඹෙන නව වසර සඳහා තම දරුවන්ට ප්ලාස්ටික් ආහාර පෙට්ටි සහ ජලය ඇසුරුම් කරන බෝතල් මිල දී ගැනීමේ දී දෙමව්පියන් වඩාත් සැළකිළිමත් වන ලෙස ඉල්ලා සිටිනවා.
මෙම ඉල්ලීම සිදු කර ඇත්තේ ශ්‍රී ලංකා මහජන සෞඛ්‍ය පරීක්ෂකවරුන් විසින්.
එම සංගමයේ සභාපති උපුල් රෝහණ මහතා පැවසුවේ; නැවත භාවිතා කළ හැකි ප්ලාස්ටික් ඇසුරුම් මිල දී ගැනීමේ දී මහජනතාව වඩාත් සැලකිලිමත් වීම අනිවාර්‍යය බවයි.
මිල දී ගන්නා ප්ලාස්ටික් ඇසුරුම්වල යට පැත්තේ අංක 5 හෝ වයින් කප් එක සහ ගෑරුප්පුව මුද්‍රණය කර නැත්නම් ඒවා මිල දී නොගන්නා ලෙස ද මහජන සෞඛ්‍ය පරීක්ෂකවරුන් ඉල්ලා සිටිනවා.
ඒ අනුව මේ දිනවල දිවයින පුරා පවත්වාගෙන යන ප්ලාස්ටික් සහ පොලිතින් අලෙවි කරන ස්ථාන පරීක්ෂා කිරීමට මහජන සෞඛ්‍ය පරීක්ෂකවරුන් කටයුතු කරමින් සිටින බවත් යම් ආකාරයකට ඉහත සඳහන් කර ඇති සළකුණු නොමැති ප්ලාස්ටික් ඇසුරුම් අලෙවි කරන ව්‍යාපාරිකයින් සිටින්නේ නම් ඔවුන්ට එරෙහිව අධිකරණය හමුවේ නඩු පැවරීමටත් කටයුතු කරන බවත් ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය නිවේදනය කරනවා.
