නව කැලණි පාලම අසලදී තියුණු ආයුධයකින් පහරදී පුද්ගලයෙකු ඝාතනයට සම්බන්ධ 18 හැවිරිදි තරුණයන් දෙදෙනෙකු පොලිස් අත්අඩංගුවට ගෙන තිබෙනවා.
ඊයේ රාත්‍රී සැකකරුවන් තියුණු ආයුධවලින් පහරදීමෙන් බරපතල තුවාල ලැබූ පුද්ගලයා කොළඹ ජාතික රෝහලට ඇතුලත් කිරීමෙන් අනතුරුවයි මරණයට පත්වී ඇත්තේ. ඔහු සේදවත්ත ප්‍රදේශයේ පදිංචි 33 හැවිරිදි අයෙක්.
සැකකාර තරුණයන් දෙදෙනා කොළඹ 14 සහ වැල්ලම්පිටිය ප්‍රදේශවල පදිංචිකරුවන්.
ඔවුන් මියගිය පුද්ගලයාගෙන් ජංගම දුරකථනය ඉල්ලා සිටීමේදී ඇති වූ බහින්බස්වීමක් මත මෙම ඝාතනය සිදු කර ඇති බවටයි පොලිස් පරීක්ෂණවලදී අනාවරණ වී ඇත්තේ.
මියගිය පුද්ගලයාගේ සිරුර කොළඹ ජාතික රෝහලේ මෘත ශරීරාගාරයේ තැන්පත් කර ඇති අතර ග්‍රෑන්ඩ්පාස් පොලිසිය වැඩිදුර විමර්ශන සිදු කරනවා.
