නව කම්කරු සංශෝධන පනත් කෙටුම්පත ගෙන එනු ලබන්නේ සියලු පාර්ශ්වයන්වල එකඟතාවෙන් පමණක් බව කම්කරු නියෝජ්‍ය අමාත්‍ය මහින්ද ජයසිංහ පවසනවා.
පසුගිය ආණ්ඩුව සකස් කළ පනත යළි ගෙන ඒමට කිසිසේත්ම කටයුතු නොකරන බවයි නියෝජ්‍ය අමාත්‍යවරයා සඳහන් කළේ.
නව පනත සඳහා යෝජනා සකස් කිරීමට විෂයය ප්‍රාමාණිකයින්ගෙන් සමන්විත කමිටුවක් ද පත්කර ඇති බව ඔහු වැඩිදුරටත් පැවසුවා.
කම්කරු දෙපාර්තමේන්තුවේ පැවැති ජාතික කම්කරු උපදේශක සභා රැස්වීමට ඊයේ (03) සහභාගී වෙමින් නියෝජ්‍ය අමාත්‍යවරයා මේ බව සඳහන් කර සිටියා.
මෙම සභා රැස්වීමේ දී තවත් කරුණු රැසක් සම්බන්ධයෙන් සාකච්ඡාවට ලක්ව ඇති අතර, එහිදී සේවක අර්ථසාධක අරමුදල පිළිබඳව ද විශේෂ අවධානයක් යොමුව තිබෙනවා.
ඒ අනුව සේවක අර්ථසාධක අරමුදල පාලනය සහ කළමනාකරණය පොදු වේදිකාවක් මතට ගෙන ඒමත් හරහා අරමුදල තවදුරටත් ශක්තිමත් කිරීමත්, සාමාජිකයින්ට ප්‍රතිලාභ ගෙවීම වඩා කාර්යක්ෂම කිරීමත් සම්බන්ධයෙන් අදහස් සහ යෝජනා මෙහිදී ඉදිරිපත්ව තිබෙනවා.
ඊට අමතරව වතු කම්කරුවන්‍, කම්කරු නීතිවලට ඇතුළත් කර ගැනීම, ජාතික අවම වැටුප ගෙවීම මෙතෙක් ආරම්භ නොකළ ආයතන සහ අපනයන වෙළෙඳපොල ශ්‍රමිකයින් පිළිබඳව මෙහිදී දීර්ඝ ලෙස සාකච්ඡාවට ලක් වුණා.
නව රජය බලයට පත්වීමෙන් අනතුරුව කම්කරු උපදේශන සභාව රැස්වූ සිව්වන අවස්ථාව මෙයයි.
