අනුරපුරේ ළමා වාට්ටුව වැසීයාමට රජය වගකිව යුතුයි – දොස්තරලා රැසක් රට හැර ගිහින් (වීඩියෝ)

අනුරාධපුර ශික්ෂණ රෝහලේ මහාචාර්ය ඒකකයේ ළමා වාට්ටුව වසා දැමීමේ පුවත ඊයේ (30) දිනයේ දී ‘දසත පුවත්’ වාර්තා කළා.

එම රෝහලේ සේවයේ නිරතව සිටි ළමා රෝග විශේෂඥ වෛද්‍යවරුන් සිව්දෙනා ම රැකියා සඳහා විදෙස් ගතවීම මීට හේතුව වී ඇති බවයි රජයේ වෛද්‍ය නිලධාරීන්ගේ සංගමය සඳහන් කළේ.

මේ සම්බන්ධයෙන් සියලු වගකීම රජය විසින් භාරගත යුතු බවයි රජයේ වෛද්‍ය නිලධාරීන්ගේ සංගමයේ ලේකම් වෛද්‍ය හරිත අලුත්ගේ මාධ්‍ය හමුවකට එකෙවෙමින් අද (31) සඳහන් කර සිටියේ.

මේ අතර මුලතිව් රෝහලේ ද ළමා රෝග වාට්ටුවේ කටයුතු ද මේ වනවිට අඩපන වී ඇති බවයි වෛද්‍ය හරිත අලුත්ගේ මෙහිදී වැඩිදුරටත් සඳහන් කර සිටියේ.

එම ළමා රෝග වාට්ටුවට විශේෂඥ වෛද්‍යවරුන් දෙදෙනෙකු අවශ්‍යව සිටිය ද මේ වනවිට එහි සේවය කරනු ලබන්නේ එක් විශේෂඥ වෛද්‍යවරයෙකු බවයි ඔහු පැවසුවේ.

එමෙන්ම එම රෝහලේම ශල්‍ය වෛද්‍ය ඒකකය ද මේ වනවිට සම්පූර්ණයෙන්ම වසා දමා ඇති බව සඳහන් කළ ලේකම්වරයා එම ඒකකයට අවශ්‍යව සිටින විශේෂඥ වෛද්‍යවරුන් දෙදෙනෙකුගේ ද හිඟයක් පවතින බව සඳහන් කළා.

මීට අමතරව පර්යන්තයේ ඇති රෝහල් රැසක ද විශේෂඥ වෛද්‍යවරුන් සහ වෛද්‍යවරුන්ගේ හිඟයක් මේ වනවිට මතුව ඇති බව මෙම මාධ්‍ය හමුවේ දී ආනාවරණය වුණා.

මේ වනවිටත් සේවයේ නියතු විශේෂඥ වෛද්‍යවරුන් සහ වෛද්‍යවරුන්ගේ මාසිකව 40ක් පමණ රට හැර යෑම සඳහා සෞඛ්‍ය අමාත්‍යාංශය වෙත අයදුම්පත් ඉදිරිපත් කරන බවයි වාර්තා වුණේ.

එමෙන්ම වෛද්‍යවරුන් 600ත් 700ත් අතර ප්‍රමාණයක් මේ වනවිට රට හැරගොස් ඇති බව ද රජයේ වෛද්‍ය නිලධාරීන්ගේ සංගමයේ ලේකම් වෛද්‍ය හරිත අලුත්ගේ සඳහන් කර සිටියා.