ට්‍රක් රථයක සැගවී ඇමරිකාවට ඇතුලු වීමට උත්සාහ කළ සංක්‍රමණිකයන් 175 දෙනෙකු මෙක්සිකෝ ආරක්ෂක අංශ විසින් අත්අඩංගුවට ගෙන තිබෙනවා.
මෙම පිරිස අතර බාලවයස්කරුවන් 30 දෙනෙකු ද වන බවයි විදෙස් මාධ්‍ය වාර්තා කළේ.
දකුණු මෙක්සිකෝවේ චියාපාස් ඩි කෝර්සෝ හිදී ට්‍රක් රථයකින් ගමන් කරමින් සිටි මෙම සංක්‍රමණිකයන් අත්අඩංගුවට ගනු ලැබුවේ එරට ආගමන බලධාරීන් සහ ජාතික ආරක්ෂක බළකාය විසින්.
නිලධාරීන් පැවසුවේ මෙම සංක්‍රමණිකයන් අතර ග්වාතමාලාව, ඉක්වදෝරය, එල් සැල්වදෝරය, ඩොමිනිකන් ජනරජය සහ පකිස්ථානය යන රටවලින් පැමිණි පිරිසක් වන බවයි.
ලතින් ඇමරිකාවේ පවතින දරිද්‍රතාව ඇතුලු මානුෂීය අර්බුධ හේතුවෙන් මෙලෙස මෙක්සිකෝව හරහා සංක්‍රමණිකයන් ඇමරිකාවට පැමිණීමේ වර්ධනයක් පෙන්නුම් කෙරෙනවා.
මෙක්සිකෝ බලධාරීන් දකුණු දේශසීමාවෙන් ගමන් කරන සංක්‍රමණිකයන්ගේ සංඛ්‍යාවේ අඩුවීමක් වාර්තා කර තිබුණ ද දේශසීමාවලදී සංක්‍රමණික පැහැරගැනීම් ද වාර්තා වී තිබෙනවා.
උතුරු මෙක්සිකෝවේ සොනෝරා ප්‍රාන්තයේ දී පසුගිය 7 වනදා ද සංක්‍රමණිකයන් 113 දෙනෙකු අත්අඩංගුවට ගනු ලැබුවා.
පසුගිය 18 වනදා, උතුරු මෙක්සිකෝවේ චියාපාස් සිට නුවෝ ලියොන් දක්වා බස් රථයක ගමන් කරමින් සිටියදී පැහැරගෙන ගිය සංක්‍රමණිකයන් 50 දෙනෙකු බේරා ගැනීමට ද බලධාරීන් සමත් වුණා.
