ශ්‍රී ලංකා නිදහස් පක්ෂයේ ජ්‍යෙෂ්ඨ උප සභාපතිවරයෙක් වන අමාත්‍ය නිමල් සිරිපා ද සිල්වා අද (08) දින කැඳවා ඇති දේශපාලන මණ්ඩල රැස්වීම නීත්‍යානුකූල නොවන බව එම පක්ෂයේ වැඩ බලන මහලේකම් පාර්ලිමේන්තු මන්ත්‍රි නීතිඥ සාරතී දුෂ්මන්ත මිත්‍රපාල පවසනවා.
අමාත්‍ය නිමල් සිරිපා ද සිල්වා වෙත ලිපයක් යොමුකරමින් වැඩ බලන මහලේකම්වරයා මේ බව පවසා ඇති බව සඳහන්.
පක්ෂයේ ව්‍යවස්ථාව අනුව දේශපාලන මණ්ඩල රැස්වීමක් කැඳවීම, තීරණයක් ගැනීම හෝ ඉල්ලීමක් සිදුකිරීමට කිසිඳු අයිතිවාසිකම හෝ බලයක් නොමැති බවයි අදාළ ලිපිය මඟින් අමාත්‍යවරයාට පෙන්වා දී තිබෙනවා.
වැඩ බලන මහලේකම්වරයා අදාළ ලිපිය මඟින් වැඩිදුරටත් දන්වා ඇත්තේ මේ වනවිටත් පක්ෂයේ තනතුරු සම්බන්ධයෙන් අධිකරණයේ නඩු ගනනාවක් ද පවතින බවයි.
එමෙන්ම පක්ෂයේ තීන්දුවක් මත ජ්‍යෙෂ්ඨ උපසභාපති ධුරය අත්හිටුවා ඇතැයි ද නිමල් සිරිපාල ද සිල්වා අමාත්‍යවරයා දැනට එම තනතුරේ පෙනී සිටින්නේ අධිකරණයෙන් ලබාගත් අතුරු නියෝගයක් මත බවද එහි සඳහන්.
ශ්‍රී ලංකා නිදහස් පක්ෂයේ හදිසි දේශපාලන මණ්ඩල රැස්වීමක් අද (08) කොළඹ පදනම් ආයතනයේ දී කැඳවා තිබෙනවා.
එම පක්ෂයේ ජ්‍යෙෂ්ඨ උප සභාපති, අමාත්‍ය නිමල් සිරිපාල ද සිල්වා විසින් මෙම රැස්වීම කැඳවා ඇති අතර පක්ෂය තුළ මතුව ඇති අර්බුද සම්බන්ධයෙන් මෙහිදී සාකච්ඡා කිරීමට නියමිතයි
මෙම දේශපාලන මණ්ඩල රැස්වීමේ දී ඉදිරි දේශපාලන තත්ත්වය සම්බන්ධයෙන් තීන්දු තීරණ රැසක් ගැනීමට ද නියමිත බවයි දේශපාලන ආරංචි මාර්ග සඳහන් කළේ.
