සෑම සාධනීය කටයුත්තක් සඳහාම, දෙවැනි නිවහන වන ශ්රී ලංකාවේ දොරටු මාලදිවයින් ජනාධිපතිවරයා වෙනුවෙන් විවෘතව ඇති බව ජනාධිපති අනුර කුමාර දිසානායක පවසනවා.
මෙරට නිල සංචාරයක නිරත මාලදිවයින් ජනාධිපති ආචාර්යය මොහොමඩ් මුයිසු සමඟ පැවති ද්විපාර්ශ්වික සාකච්ඡාවලින් අනතුරුව දෙරටේ රාජ්ය නායකයින් දෙදෙනා පැවැත්වූ ඒකාබද්ධ මාධ්ය හමුවේ දී ජනාධිපතිවරයා මේ බව සඳහන් කළා.
ශ්රී ලංකාව දිට්වා සුළි කුණාටුවට මුහුණ දුන් අවස්ථාවේ දී මාලදිවයින් රජය සහ එරට ජනතාව ලබාදුන් ශක්තිය සහ සහයෝගය ජනාධිපති අනුර කුමාර දිසානායක මෙහිදී ගෞරවයෙන් යුතුව සිහිපත් කළා.
එමෙන්ම මාලදිවයින් ජනාධිපතිවරයා ඇතුළු දූත පිරිස අතර පැවති සාකච්ඡාවේ දී දෙරට අතර පවතින බහුවිධ සබඳතාවල වත්මන් තත්ත්වය සමාලෝචනය කළ බවයි ඔහු සඳහන් කළේ.
දෙරටේ ජනතාවට අන්යෝන්ය ප්රතිලාභ ලබාදීම වෙනුවෙන් බොහෝ ක්ෂේත්රවල සහයෝගීතාව තවදුරටත් වැඩිදියුණු කිරීම සහ විවිධාංගීකරණය කිරීමට ඇති ක්රම පිළිබඳව මෙම සාකච්ඡාවල දී අදහස් හුවමාරු කරගත් බවද ජනාධිපතිවරයා මෙහිදී පවසා සිටියා.
එමෙන්ම සංචාරක, අධ්යාපන, උසස් අධ්යාපන, සෞඛ්ය , ක්රීඩා, තරුණ සංවර්ධනය, ලේඛනාගාර, ආරක්ෂක අංශවල කේෂ්ත්රවල සහයෝගීතාවය පිළිබඳ අවබෝධතා ගිවිසුම් කිහිපයක ද මාලදිවයින් රජය සමඟ අත්සන් තැබූ බවත් අනුර කුමාර ජනාධිපතිවරයා මෙහිදී අවධාරණය කළා.
කලාපයේ වැදගත් ආර්ථක හවුල්කරුවෙකු ලෙස ශ්රී ලංකාව, මාලදිවයින පිළිගන්නා බවත්, මාලදිවයින සමඟ මෙම හවුල්කාරීත්වය තව දුරටත් පුළුල් කිරීම සඳහා උනන්දුවන බවත් ජනාධිපතිවරයා වැඩිදුරටත් සඳහන් කර සිටියා.
නිල සංචාරයක් සඳහා දිවයිනට පැමිණි මාලදිවයින් ජනාධිපතිවරයා පිළිගැනීමේ නිල උත්සවය අද (04) පෙරවරුවේ ජනාධිපති ලේකම් කාර්යාලයේ දී පැවැත් වුණා.
එහිදී මාලදිවයින් ජනාධිපතිවරයාට, ජනාධිපති අනුර කුමාරගෙන් හිමි වුණේ උණුසුම් පිළිගැනීමක්.
