මරණ දඬුවම නියම වී සිටි හිටපු පාර්ලිමේන්තු මන්ත්‍රී දුමින්ද සිල්වා මහතාව නිදහස් කිරීම සම්බන්ධයෙන් මේවන විට සමාජයේ දැඩි කතාබහක් නිර්මාණය වී තිබෙනවා.
ඔහු ඊයේ (23) දින නිදහස් වූයේ ජනාධිපති සමාව යටතේ යි.
මෙවන් පසුබිමක වැලිකඩ බන්ධනාගාරයේ රැඳවියන් පිරිසක් එහි වහළක් මත නැග විරෝධතාවක් ආරම්භ කර තිබෙනවා.
මරණ දඬුවම නියම වූ රැඳවියන් පිරිසක් මෙලෙස විරෝධතාවයේ යෙදී සිටින බව සඳහන්.
“එකම රටක් වෙනම නීතියක් ද? ඇති උන්ට ඇත” වැනි විරෝධතා පුවරු ද ඔවුන් වහළයේ සිට ප්‍රදර්ශනය කරනු දක්නට ලැබුණා.
තමන්ට නියම කළ දඬුවම ලිහිල් කරන ලෙස යි ඔවුන් ඉල්ලා සිටින්නේ.
මරණ දඬුවම යන දඬුවම ඉවත් කර, එය නියම වූ දා සිට ක්‍රියාත්මකවන පරිදි ජීවිතාන්තය දක්වා වූ සිරදඬුවමක් ලෙස නියම කරන ලෙසට ඔවුන් ඉල්ලා සිටිනවා.
මෙම ඉල්ලීම මුල්කරගනිමින් තවත් රැඳවියන් පිරිසක් ආහාර වර්ජනයක් ද අරඹා ඇති බව වාර්තා වනවා.
මේ අතර මහර බන්ධනාගාරයේ රැඳවියන් පිරිසක් ද විරෝධතාවක් ආරම්භ කර තිබෙනවා.
ඔවුන් ද ආහාර ලබා ගැනීම ප්‍රතික්ෂේප කරන බව සඳහන්.
එම පිරිසගේ ඉල්ලීම වී ඇත්තේ ද මරණ දඬුවම යන දඬුවම ඉවත් කර, එය නියම වූ දා සිට ක්‍රියාත්මකවන පරිදි ජීවිතාන්තය දක්වා වූ සිරදඬුවමක් ලෙස නියම කරන ලෙස යි.
