දුම්රිය අත්‍යවශ්‍ය සේවාවක් බවට පත් කිරීමට රජය තීරණය කර තිබෙනවා.
කැබිනට් තීරණ දැනුම්දීමේ මාධ්‍ය හමුවට එක්වෙමින් අමාත්‍ය බන්දුල ගුණවර්ධන සඳහන් කළේ අද මධ්‍යම රාත්‍රියේ සිට මෙම තීරණය ක්‍රියාවට නැංවෙන බවයි.
අදාළ යෝජනාව ජනාධිපතිවරයා වෙත ඉදිරිපත් කෙරෙන අතර හෙට දිනයේ සිට දුම්රිය මගීන්ට සිදුවන අපහසුතා මගහැරී යනු ඇති බව ද ඔහු ප්‍රකාශ කළා.
දුම්රිය සේවක වර්ජනය හමුවේ දුම්රිය ධාවනයට එල්ල වී ඇත්තේ දැඩි බාධාවක්.
දුම්රිය ලොකොමෝටිව් ඔපරේටින් ඉංජිනියර්ස් සංගමය විසිනුයි ධාවනාගාර කිහිපයක ඊයේ මධ්‍යම රාත්‍රියේ සිට වර්ජනයක් ආරම්භ කර ඇත්තේ.
එම සංගමය ඊයේ මාධ්‍ය හමුවක් පවත්වමින් සඳහන් කළේ වැටුප් වර්ධක සම්බන්ධ ගැටලුවක් මුල්කර ගනිමින් වර්ජනය ක්‍රියාත්මක කරන බවයි.
අද කාර්යාල දිනයක් බැවින් කාර්යාල සේවකයන් මෙන්ම පාසල් සිසුන් ද දුම්රිය නොමැති වීමෙන් දැඩි අපහසුතාවට පත්ව සිටින ආකාරය දැකගත හැකිවුණා.
අද දුම්රිය ගමන්වාර 36ක් පමණ අවලංගු කර ඇති බවයි වාර්තා වුණේ.
ඊයේ පෙරවරුවේ ද දුම්රිය සේවකයන්ගේ හදිසි වර්ජනයක් හේතුවෙන් දුම්රිය ධාවනයට බාධා එල්ල වුණා. එහෙත් බලධාරීන් සමග පැවති සාකච්ඡාවකින් පසුව එම වර්ජනය අවසන් කෙරුණා.
ඒ අතරතුරයි තවත් දුම්රිය සේවක සංගමයක් ඊයේ රාත්‍රියේ මාධ්‍ය හමුවක් පවත්වමින් වැඩවර්ජනයක් ගැන සදහන් කළේ.
දුම්රිය සේවකයන් නිරන්තරයෙන් සිදුකරන වර්ජන හේතුවෙන් තමන් අපහසුතාවට පත් කිරීම බලවත් අසාධාරණයක් බව දුම්රිය මගීන් පවසනවා.
