ප්‍රදේශ දෙකකදී දියේ ගිලීමෙන් පුද්ගලයන් දෙදෙනෙකු ජීවිතක්ෂයට පත්වී තිබෙනවා.
තණමල්විල සහ පොතානේගම ප්‍රදේශවලදීයි මෙම අනතුරු වාර්තා වී ඇත්තේ. මිගලෑව පොතානේගම ප්‍රදේශයේදී දියේ ගිලීමෙන් මියගොස් ඇත්තේ 81 හැවිරිදි පුද්ගලයෙක්.
ඔහු පෙරේදා (30) උදෑසන හේනට යන බවට පවසා පාපැදියකින් පිටත්ව ගොස් තිබුණා.
තම පියා නැවත නිවසට නොපැමිණීම හේතුවෙන් කළ සොයා බැලීමේදී ඔහු ගමන් කළ පාපැදිය ඇහැටුවැව වීරමුණියාගම ප්‍රදේශයේ තිබි හමුවූ අතර පියා අතුරුදන්ව ඇති බවට දරුවන් විසින් කළ පැමිණිල්ලක් අනුවයි විමර්ශන ආරම්භ කෙරුණේ.
පොලිසිය කළ විමර්ශනයේදී ඊයේ උදෑසන සියඹලන්ගමුව ඔය ඉවුරේ තිබී අතුරුදන්වූ පුද්ගලයාගේ මෘත ශරීරය සොයා ගැණුනා.
පශ්චාත් මරණ පරීක්ෂණයෙන් අනතුරුව දේහය ඥාතීන්ට භාරදී ඇති අතර මිගලෑව පොලිසිය පරීක්ෂණ සිදු කරනවා.
මේ අතර තණමල්විල තිලකරත්න වැවේ ගිලී පුද්ගලයෙකු මියගොස් ඇති බවට පොලිසියට ලැබුණු පැමිණිල්ලක් මත විමර්ශණ ආරම්භ වී තිබෙනවා.
පොලිසිය සිදු කළ පරීක්ෂණයේදී අනාවරණ වී ඇත්තේ මියගොස් ඇති පුද්ගලයා පසුගිය 30 වනදා දහවල් කාලයේ බලහරුව තිලකරත්න වැව ප්‍රදේශයේදී මී ගවයන්ට තණ කවමින් සිටියදී අතුරුදන්ව ඇති අයෙක් බවටයි.
19 හැවිරිදි තරුණයෙක් වන ඔහු කිතුල්කොටේ ප්‍රදේශයේ පදිංචිකරුවෙක්. මෘත ශරීරය වැල්ලවාය රෝහලේ තැන්පත් කර ඇති අතර පශ්චාත් මරණ පරීක්ෂණයක් සිදු කිරීමට නියමිතයි. තණමල්විල පොලිසිය පරීක්ෂණ සිදු කරනවා.
