ශ්රී දළදා වහන්සේගේ ගිහි භාරකාරීත්වය හිමි වන දියවඩන ධුරය සඳහා අභිනව දියවඩන නිලමේවරයෙකු පත් කරගැනිමේ කටයුතු මේ දින වල සිදු වෙමින් පවතිනවා.
1931 අංක 19 දරන විහාර දේවාලගම් පනතට අනුව වසර 10ක කාලයකට නිලවරණයක් මගින් දියවඩන නිලමේවරයා පත් කරගනු ලබනවා.
මෙවර එම නිලවරණය සඳහා, වර්තමාන දියවඩන නිලමේවරයා ඇතුළු අපේක්ෂකයින් ගණනාවක් ඉදිරිපත්ව සිටිනවා.
මෙරට ප්රථම බෞද්ධයා ලෙස සම්භාවනාවට පාත්ර වන දියවඩන නිලමේ ධුරය සම්බන්ධයෙන් මේ වන විට අපහාසාත්මක සංවාද සමාජයේ හුවමාරු වෙමින් පවතින බවත් එමඟින් සමස්ත බෞද්ධ සමාජයේ ගෞරවයට සිදුවන හානිය පිළිබඳවත් දැනුවත් කරමින් මල්වතු – අස්ගිරි මහා නාහිමිවරුන් විසින් නිවේදනයක් නිකුත් කර තිබෙනවා.
මහා නාහිමිවරුන් විසින් නිකුත් කළ නිවේදනයේ දැක්වෙන්නේ, තමන් සහයෝගය දක්වන අපේක්ෂකයා ප්රවර්ධනය කිරීමේ පටු අරමුණින් විවිධ බාහිර පාර්ශ්ව මගින් සිදුකරන අපහාසාත්මක ප්රචාරයන් හේතුවෙන් මේ වන විට ලෝකය ඉදිරියේ බෞද්ධ සමාජය හෑල්ලුවට ලක්වෙමින් පවතින බවත්, බෞද්ධ සිද්ධස්ථාන සම්බන්ධයෙන් සාවද්ය ප්රතිරූපයක් සමාජගත වීමත් සංවේගයට කරුණක් බවයි.
“පුද්ගලික න්යාය පත්රයන් පෙරදැරි කරගනිමින් විවිධ සංවිධාන හා පුද්ගලයන් මෙම කාලසීමාව තුළ බෞද්ධ සමාජය අපහාසයට ලක් කරමින් පටු චේතනාවෙන් පදනම් විරහිතව සිදුකරන වෛරී සහගත ප්රකාශයන් හෙළාදකින බවත් එවැනි පටු අරමුණු ප්රතික්ෂේප කරමින් ශ්රී දළදා මාළිගාවේ මෙන්ම දියඩවන නිලමේ ධුරය, බස්නායක නිලමේ ධුරය ඇතුළු සිද්ධස්ථාන හා සැබැඳි නිලයන්ගේ සම්භාවනීයත්වය මෙන්ම ගෞරවය ආරක්ෂා කර ගනිමින් කටයුතු කිරීමට සියලු අපේක්ෂකයින් අධිෂ්ඨාන කරගත යුතු බවත් අවධාරණය කර සිටිමු.” යනුවෙන් ද මල්වතු – අස්ගිරි මහා නාහිමිවරුන් විසින් නිකුත් කළ සඳහන් වනවා.
👍සම්පූර්ණ ඇත්ත. මින් පසුවවත් බොරු බේගල් පතුරන්නේ නැතුව තනතුරේ ගෞරවය ආරක්ෂා කළ යුතුය. මේ මේ තනතුරට බෞද්ධ ජනතාවගේ තියෙන ගෞරවය නැති කරන්න හදන්න එපා.