උපකාරක පන්ති යන පවසා නිවසින් පිටව ගිය පාසල් සිසුවියන් තිදෙනෙකු සහ සිසුවෙකු අතුරුදහන් බවට පොලිසියට ලද පැමිණිල්ලක් මත විමර්ශන ආරම්භ කර තිබෙනවා.
අප ප්‍රාදේශීය වාර්තාකරු පැවසුවේ; තලවකැලේ පොලිස් වසමට අයත් ග්‍රේට් වෙස්ටර්න් වතුයායේ ලුසා කොටසේ පදිංචි අවු:
14 සහ 16 යන වයස් කාණ්ඩයේ පසුවන පාසල් සිසුවියන් තිදෙනෙකු සහ සිසුවෙකු මෙලෙස පසුගිය 14 වැනි දින සිට අතුරුදන් ව ඇති බවට තලවකැලේ පොලිසිය වෙත එම ළමුන්ගේ දෙමාපියන් විසින් සිදු කරන ලද පැමිණිල්ලක් මත පරීක්ෂණ ආරම්භ කළ බවයි.
මෙලෙස අතුරුදන් ව ඇත්තේ; තලවකැලේ ග්‍රේට් වෙස්ටර්න් වතුයායේ ලුසා කොටසේ පදිංචි දමිළ මහා විද්‍යාලයේ 11 වසරේ හා 09 වසරේ අධ්‍යාපනය ලබමින් සිටි සිසු දරුවන් බවයි වාර්තා වන්නේ.
පසුගිය 14 වැනි දින මොවුන් උපකාරක පන්ති යන බව පිටව ගිය බවත්; ඉන් පසුව ඔවුන් යළි නිවෙස් වෙත නොපැමිණි හෙයින් තමන් පොලිසියට පැමිණිලි කළ බවයි එම දෙමාපියන් ප්‍රකාශ කළේ.
අතුරුදන් වූ සිසුවා සහ සිසුවියන් තිදෙනා ඥාතීන් බවට ද තොරතුරු වාර්තා වනවා.
කෙසේවෙතත් දින 04ක් ඉක්ම ගොස් මෙතෙක් අතුරුදන් වූ දරුවන් පිළිබඳ ව කිසිදු හෝඩුවාවක් ලැබී නොමැති අතර සිද්ධිය සම්බන්ධයෙන් විශේෂ පොලිස් කණ්ඩායම් කිහිපයක් මේ වනවිට විමර්ශන අරඹා තිබෙනවා.
