ශ්රී ලංකා ක්රිකට් කණ්ඩායමේ හිටපු නායකයෙකු වන දිනේෂ් චන්දිමාල් අද ටෙස්ට් ලකුණු 5000 රැස් කළ 11 වැනි ශ්රී ලාංකිකයා බවට පත් වුණා.
නවසීලන්තයට එරෙහිව ක්රයිස්ට්චර්ච්හිදී පැවැත්වෙන පළමු ටෙස්ට් තරගයේ ශ්රී ලංකා දෙවැනි ඉනිමේ දී ලකුණු 25ක් ලබා ගනිමිනුයි චන්දිමාල් මෙම සන්ධිස්ථානයට ළඟා වූයේ.
දිනේෂ් චන්දිමාල් ක්රීඩා කරමින් සිටින්නේ ඔහුගේ 71 වැනි ටෙස්ට් තරගයටයි.
2011 වසරේ සිය මංගල තරගයට පිවිසීමෙන් පසු චන්දිමාල් ටෙස්ට් ශතක 13ක් සහ අර්ධ ශතක 24ක් ලබාගෙන තිබෙනවා.
මේ අතර ඇන්ජලෝ මැතිව්ස් මෙම තරගයේ පළමු ඉනිමේදී ටෙස්ට් ලකුණු 7000 සීමාව පසු කළා.
ඔහු මේ වන විට ශ්රී ලංකාව වෙනුවෙන් වැඩිම ටෙස්ට් ලකුණු රැස් කළ ක්රීඩකයන්ගේ ලයිස්තුවේ තුන්වන ස්ථානයේ යි පසු වන්නේ.
ක්රයිස්චර්ච් හිදී පැවැත්වෙන පළමු ටෙස්ට් තරගයේ පළමුව පන්දුවට පහරදුන් ශ්රී ලංකාව පළමු ඉනිම සඳහා ලකුණු 355ක් රැස් කළ අතර නවසීලන්තය සිය පළමු ඉනිම වෙනුවෙන් ලකුණු 373ක් ලබා ගැනීමට සමත් වුණා.
දෙවන ඉනිම වෙනුවෙන් පන්දුවට පහරදෙමින් සිටින ශ්රී ලංකාව කඩුලු 4ක් දැවී ලකුණු 150ක් ලබා සිටිනවා. ඇන්ජෙලෝ මැතිව්ස් නොදැවී ලකුණු 54ක් සහ දිනේෂ් චන්දිමාල් ලකුණු 27ක් ලබා පන්දුවට පහරදෙමින් සිටියා.
