වනජීවී සහ වෘක්ෂලතා ආරක්ෂණ ආඥා පනතට එරෙහිව ශ්‍රී ලංකාවට බලපත්‍ර නොමැතිව නීතිවිරෝධී ආනයනය කළ ලංකාවේ පරිසර පද්ධතියට බලපෑම් කළ හැකි ජලජ ජීවීන් පිරිසක් නීතිවිරෝධී ලෙස මෙරටට රැගෙන ආ ගුවන් මගීන් තිදෙනකු ඊයේ (01) උදෑසන කටුනායක ගුවන් තොටුපොළ පැමිණීමේ පර්යන්තයේ දී ශ්‍රී ලංකා රේගුවේ ජෛව විවිධත්ව ආරක්ෂණ ඒකකයේ නිලධාරීන් වෙත ලද බුද්ධි තොරතුරක් මත ගුවන් තොටුපොළ රේගු නිලධාරීන් පිරිසක් එක්ව අත්අඩංගුවට ගැනුණා.
සැකකරුවන් තිදෙනා වේයන්ගොඩ ප්‍රදේශයේ පදිංචි සුරතල් මසුන් ව්‍යාපාරික කටයුතුවල නිරත කාන්තාවක සහ පිරිමි පුද්ගලයන් දෙදෙනෙක් බවයි අනාවරණය වී ඇත්තේ.
සැකකරුවන් ඊයෙ උදෑසන 09.35 ට තායිලන්තයේ බැංකොක් නුවර සිට ශ්‍රී ලන්කන් ගුවන් සේවයේ යූ.එල්.- 403 දරන ගුවන් යානයෙන් කටුනායක ගුවන් තොටුපොළ වෙත පැමිණ සිටියදී මෙලෙස අත්අඩංගුවට ගැනුණේ සිදු කරන ලද සෝදිසියකින් අනතුරුවයි.
ඔවුන් විසින් රැගෙන ආ ගමන් මළු තුළ රතු කන් ඉබ්බන්, ඇළි රතු කන් ඉබ්බන්, රතු වළිග මගුරන්, ඇළි කිඹුල් මත්ස්‍යයන්, විවිධ වර්ගවල ගොළුබෙල්ලන් සහ ඌරෙකුගේ මෙන් නාසයක් ඇති පිග් නෝස් ඉබ්බන් විශාල ප්‍රමාණයක් ද සිට තිබෙනවා.
අත්අඩංගුවට ගෙන ඇති රතු කන් ඉබ්බන් වර්ග දෙක, දැනට ලෝකයේ සිටින ආක්‍රමණශීලී ම ඉබ්බන් විශේෂයක් බවත්, රතු වළිග මගුරන් ද, එම මසුන්ට වඩා විශාල මසුන් පවා ඉතා පහසුවෙන් ගිල දැමිය හැකි මත්ස්‍යයන් විශේෂයක් බවත් රේගු ජෛව විවිධත්ව ආරක්ෂණ ඒකකයේ උසස් නිලධාරීවරයෙකු ප්‍රකාශ කළ බවයි දසත ගුවන්තොටුපොළ වාර්තාකරු පැවසුවේ.
මේ වනවිට මෙම සතුන් රේගු නිලධාරීන් භාරයේ ඇති අතර, මේ පිළිබඳ ව මෙම සතුන් රැගෙන ආ ශ්‍රී ලන්කන් ගුවන් සේවයේ නිලධාරීන් දැනුවත් කිරීමට පියවර ගෙන ඇති බවත් වාර්තා වනවා.
මේ පිළිබඳව සිදු කරන රේගු විමර්ශනයකින් පසුව මෙම ජලජ ජීවීන් තොගය ආපසු තායිලන්තය බලා ප්‍රති අපනයනය කිරීමට කටයුතු කරනු ඇති.
