අගමැති නරේන්ද්‍ර මෝදිගේ වියානා සංචාරය දශක හතරකට වැඩි කාලයකට පසු ඉන්දීය අග්‍රාමාත්‍යවරයාගේ පළමු සංචාරය සනිටුහන් කරන බැවින් එය “විශේෂ ගෞරවයක්” බව ඔස්ට්‍රියානු චාන්සලර් කාල් නෙහැම්මර් පවසනවා.
තවද, මෙම සංචාරය දෙරට අතර රාජ්‍ය තාන්ත්‍රික සබඳතාවල 75 වසර සැමරීම සමඟ සමපාත වන බව ද ඔහු එක්ස් ගිණුමේ සටහනක් තබමින් පැවසුවා.
1983 දී ඉන්දිරා ගාන්ධිගේ සංචාරයෙන් පසු වසර 41 කට පසු ඉන්දීය අගමැතිවරයෙකුගේ පළමු සංචාරය සනිටුහන් කරමින් ජූලි 9 වැනිදා අගමැති මෝදි ඔස්ට්‍රියාවේ සංචාරය කිරීමට නියමිතයි.
චාන්සලර් නෙහාමර් මෙම සංචාරයේ වැදගත්කම අවධාරණය කළ අතර, එය ද්විපාර්ශ්වික සබඳතා පුලුල් කිරීමට සහ විවිධ භූ දේශපාලනික අභියෝග සම්බන්ධයෙන් සහයෝගීතාව වැඩි දියුණු කිරීමට අවස්ථාවක් ලබා දෙන බව සඳහන් කළා.
“අපගේ ද්විපාර්ශ්වික සබඳතාව තවදුරටත් පුලුල් කිරීමට සහ බොහෝ භූ දේශපාලනික අභියෝග සම්බන්ධයෙන් සමීප සහයෝගීතාව පිළිබඳව කතා කිරීමට අපට අවස්ථාව ලැබෙනු ඇත,” ඔස්ට්‍රියානු චාන්සලර්වරයාගේ එක්ස් සටහනේ දැක්වුණා.
අග්‍රාමාත්‍ය නරේන්ද්‍ර මෝදි ජුලි 08 වැනිදා සිය රුසියානු සංචාරය අවසන් කිරීමෙන් පසු ඔස්ට්‍රියාව බලා යෑමට නියමිතයි.
ඔස්ට්‍රියාවේ සංචාරයක නිරත වූ පළමු ඉන්දීය නායකයා ලෙස හිටපු අගමැති ජවහර්ලාල් නේරු 1955 දී ඔස්ට්‍රියානු චාන්සලර් ජුලියස් රාබ් හමුවුණා.
1999 නොවැම්බර් මාසයේ දී එවකට ඉන්දීය ජනාධිපති කේ.ආර්.නාරායනන් ඔස්ට්‍රියාවේ සංචාරය කළ අතර ඉන් අනතුරුව 2011 වසරේ හිටපු ජනාධිපති ප්‍රතිභා පටිල් එරට සංචාරයක නිරත වී තිබෙනවා.
අගමැතිවරයෙක් ලෙස ඉන්දිරා ගාන්ධි 1983 දී අවසන් වරට ඔස්ට්‍රියාවට පැමිණි අතර ඇය 1971 දී ද වියනා හි සංචාරය කළා.
