උතුරු පයාගල මංසන්ධියේ දී සිදු වූ මාරක අනතුරකින් 25 හැවිරිදි විවාහක ත්‍රීරෝද රථ රියදුරෙකු ජීවිතක්ෂයට පත් ව තිබෙනවා.
ඊයේ (22) රාත්‍රියේ දී මෙම අනතුරට මුහුණ පා ඇත්තේ ත්‍රීරෝද රථයක් සහ මෝටර් රථයක් බවයි දසත වාර්තාකරු පැවසුවේ.
මරණකරු පැදවූ ත්‍රීරෝද රථය මෝටර් රථයක් ගැටී පෙරලීමෙන් එහි රියදුරු පිටිපසින් ආ තවත් මෝටර් රථයකට යට වී ජීවිතක්ෂයට පත් වුණා.
අනතුරෙන් මියගොස් ඇත්තේ පයාගල – අංගංගොඩ ප්‍රදේශයේ පදිංචි ව සිටි තරුණයෙක්.
ත්‍රී රෝද රථය කළුතර දෙස සිට බේරුවල දෙසට ගමන් කර ඇති අතර, උතුරු පයාගල මංසන්ධිය ආසන්නයේ දී දකුණු පසට හැරවීමට සූදානම් ව සිටියදී පිටුපසින් පැමිණි මෝටර් රථයේ ගැටී ත්‍රීරෝද රථය මාර්ගයේ දකුණු පසට පෙරළී ගොස් තිබෙනවා.
ඒ සමගම බේරුවල දෙසින් පැමිණි මෝටර් රථයක ද ත්‍රී රෝද රථය ගැටී ඇති බවයි හෙළි ව ඇත්තේ.
අනතුරින් තුවාල ලැබූ ත්‍රිරෝද රථ රියදුරු කළුතර ශික්ෂණ රෝහලට රැගෙන ගොස් ඇති අතර රෝහල්ගත කිරීමෙන් පසුව මියගොස් තිබෙනවා.
මරණකරු සිය දරුවාට ඖෂධ ගෙන ඒමට ඖෂධහලට යමින් සිටියදියි අනතුරට මුහුණපා ඇත්තේ.
මෝටර් රථ දෙකෙහිම රියදුරන් දෙදෙනා අත්අඩංගුවට ගෙන ඇති බවයි වාර්තා වන්නේ.
සැකකරුවන් කළුතර මහේස්ත්‍රාත් අධිකරණයට ඉදිරිපත් කිරීමට නියමිතයි.
