දරුවන්ට එල්ල වූ පිහි ප්‍රහාරයකින් උතුරු එංගලන්තය කැලඹෙයි

උතුරු එංගලන්තයේ සවුත්පෝර්ට් හි පිහි ඇනුමක් සිදු ව තිබෙනවා.

මෙම සිදුවීම අද (29) පෙරවරු 11.50ට පමණ සිදු ව ඇති බවයි විදෙස් මාධ්‍ය වාර්තා පෙන්වා දෙන්නේ.

පිහි ඇනුමෙන් ගැහැනු ළමුන් 08 දෙනෙකු අවම වශයෙන් බරපතළ තුවාල ලබා ඇති බවත් පැවසෙනවා.

තුවාලකරුවන් මේ වනවිට ප්‍රදේශයේ ළමා රෝහල් වෙත සහ රජයේ මෙන් ම පෞද්ගලික රෝහල් වෙත මාරු කර යවා ඇති බවත් සඳහන්.

මර්සිසයිඩ් පොලිසිය පැවසුවේ පිහි ඇනුම පිළිබඳ වාර්තා ලැබී ඇති අතර සිදුවීම සිදුවන අවස්ථාවේ දී පොලිස් හදිසි ඇමතුම් අංශයට අපරාධය පිළිබඳ ව තොරතුරු වාර්තා වූ බවත්; ඒ සමග ම පොලිසිය ක්‍රියාත්මක වූ බවයි.

කෙසේවෙතත් සිද්ධිය සම්බන්ධයෙන් ප්‍රාදේශීය පොලිසිය සඳහන් කර ඇත්තේ;

”සිද්ධියෙන් සිදු ව ඇති ජීවිත හානි ගණන ඉහළ යා හැකි බවත්; තවමත් සිදුවීම පිළිබඳ කරුණු අනාවරණය වෙමින් පවතින බවයි. එමෙන්ම අපරාධය සිදු කළා යැයි පැවසෙන පිරිමි පුද්ගලයෙකු පොලිස් අත්අඩංගුවේ සිටින බවත්; අපරාධ‍ය සඳහා යොදාගත් පිහිය ද මේ වනවිට පොලිස් භාරයට ගෙන ඇති බවත් පොලිසිය සඳහන් කළා.

අදාළ සැකකරු මේ වනවිට දැඩි පොලිස් ආරක්ෂාව යටතේ පොලිස් ස්ථානය වෙත රැගෙන ගොස් අවසන්..” බවත් එම පොලිසිය පවසනවා.

මෙම සිදුවීම පිළිබඳ ව ප්‍රාදේශීය ව්‍යාපාරිකයෙකු වන කොලින් පැරී නමැත්තා විසින් සිය ඇසින් දුටු සාක්ෂි පොලිසිය හමුවේ සිදු කරමින් සඳහන් කර ඇත්තේ; සවුත්පෝට් හි සිදුවීම හරියට ත්‍රාසජනක චිත්‍රපටයක දර්ශනයක් වැනි යැයි කියාය.

අදාළ සිදුවීමට මුහුණ පා ඇත්තේ වයස අවුරුදු 11ක් පමණ වන වයස් කාණ්ඩයේ පසුවන දරුවන් බවත් හෙළි ව තිබෙනවා.

සවුත්පෝට් සිට සැතපුම් 20ක් පමණ දුරින් ලිවර්පූල් හි ඇල්ඩර් හේ ළමා රෝහල් භාරයේ මෙම තුවාල ලැබූ දරුවන් ප්‍රතිකාරයේ පසුවනවා.

කෙසේවෙතත් මෙම සිදුවීමෙන් තුවාල ලැබූ දරුවන්ගේ දෙමාපියන් මෙල්ල කරගැනීම අපහසු වූ බවත් විදෙස් මාධ්‍ය වාර්තා කරනවා.

සවුත්පෝට් නියෝජනය කරන බ්‍රිතාන්‍ය පාර්ලිමේන්තු මන්ත්‍රී පැට්‍රික් හර්ලි පවසන්නේ “සිද්ධිය” පිළිබඳ ව තමා “දැඩි කනස්සල්ලට පත් වූ” බවයි.

“විපතට පත් වූවන්ට දිය හැකි හොඳම සාධාරණය මම බලාපොරොත්තු වෙනවා. මගේ සිතුවිලි විපතට පත් වූ සියලු දෙනාට, ඔවුන්ගේ ආදරණීයයන්ට සහ සමස්ත ප්‍රජාවට පිරිනැමෙනවා…”යනුවෙන් හර්ලි X හි සඳහන් කර තිබෙනවා.