මෙරට ජනතාවගේ දිළිඳුකම පිටුදැකීම සහ දරුවන්ගේ පෝෂණය ඉහළ නැංවීම වෙනුවෙන් ජනාධිපති රනිල් වික්රමසිංහ ප්රමුඛ අවධානයක් යොමු කර කටයුතු කරන බව ජාතික ආරක්ෂාව පිළිබඳ ජනාධිපති ජ්යෙෂ්ඨ උපදේශක හා ජනාධිපති කාර්ය මණ්ඩල ප්රධානී සාගල රත්නායක පවසනවා.
ඒ වෙනුවෙන් ජනාධිපතිවරයාගේ මඟපෙන්වීම ඇතිව මේ වන විට වැඩසටහන් රැසක් ක්රියාවට නංවා තිබෙන බවයිඔහු සඳහන් කළේ.
ජනාධිපතිවරයාගේ සංකල්පයක් මත ආරම්භ කෙරුණු “අස්වැසුම” වැඩසටහන මෙරට දිළිඳුකම පිටුදැකීම සඳහා පුරෝගාමී මෙහෙවරක් ඉටු කරන බවත් කිසිසේත් දේශපාලනීකරණය නොවූ අස්වැසුම මෙරට ජනතාවගේ දිළිඳුකම පිටුදැකීම වෙනුවෙන් ශක්තිමත් දායකත්වයක් ලබාදෙනු ඇති බවත් ඔහු පැවසුවා.
ජනාධිපති කාර්ය මණ්ඩල ප්රධානී සාගල රත්නායක මේ බව සඳහන් කර සිටියේ ඊයේ (01) කොළඹ රාමඩා හෝටල් පරිශ්රයේ දී පැවැත්වුණු සබලකෘත සහල් (Fortified Rice) පාසල් දරුවන්ගේ දිවා ආහාර වේලට එකතු කිරීමේ වැඩසටහනෙහි සමාරම්භක අවස්ථාවට එක් වෙමින්.
පාසල් දරුවන්ගේ පෝෂණ තත්ත්වය ඉහළ නැංවීම අරමුණු කර ගනිමින් කෘෂිකර්ම හා වැවිලි කර්මාන්ත අමාත්යාංශය, අධ්යාපන අමාත්යාංශය, ලෝක ආහාර වැඩසටහන, ආහාර ප්රවර්ධන මණ්ඩලය, බිල් සහ මෙලින්ඩා ගේට්ස් පදනම ඒකාබද්ධව මෙම වැඩසටහන ක්රියාත්මක කරනවා.
දරුවන්ගේ රක්තහීනතාවය, මතක දුර්වලතා සහ ශරීර වර්ධනය අඩාල වීම ඇතුළු ඒ ආශ්රිත රෝග සඳහා පිළියම් සෙවීම ද මෙමඟින් අපේක්ෂා කෙරෙනවා.
යකඩ සහ ෆෝලික් අම්ල අඩංගුකර සකස් කරන ලද සබලකෘත සහල් අධ්යාපන අමාත්යාංශයට නිල වශයෙන් භාර දීම මෙහිදී සිදු කෙරුණා.
මෙහිදී අදහස් දැක්වූ සාගල රත්නායක වැඩිදුරටත් පෙන්වා දුන්නේ අනාගත පරපුර නිරෝගී පරපුරක් ලෙස ගොඩනැඟීම අත්යවශ්ය වන බවත් පෝෂණය යනු කුසගින්න නිවා දැමීම පමණක් නොව රටේ අනාගතය හැඩගැස්වීමේ දී තීරණාත්මක කාර්යභාරයක් ඉටු කරනු ලබන සාධකයක් බවයි.
මෙම වැඩසටහන ක්රියාවට නැංවීම සඳහා විවිධ පාර්ශ්ව වෙතින් ලැබෙන සහාය පිළිබඳ ස්තුතිය පළ කළ ඔහු විශේෂයෙන් බිල් ඇන්ඩ් මෙලින්ඩා ගේට්ස් පදනම වෙතින් ලද සහයෝගය ඇගයීමට ලක් කළා.
පාසල් දරුවන්ගේ පෝෂණය ඉහළ නැංවීමට මෙතෙක් ක්රියාත්මක වූ වැඩසටහන් පිළිබඳව ද මෙහිදී සිහිපත් කළ සාගල රත්නායක ලෝක ආහාර වැඩසටහනේ මැදිහත් වීමෙන් 2003 වර්ෂයේ දී මෙම පෝෂණ වැඩසටහන සඳහා වූ මුලපිරීම සිදු කෙරුණු බව ද කියා සිටියා.
