1998 වසරේ දකුණු කොරියාවේ දී 18 හැවිරිදි තරුණියක් දූෂණය කිරීමේ චෝදනාව සම්බන්ධයෙන් නිදොස් කොට නිදහස් කර තිබෙන ශ්රී ලාංකික විත්තිකරුවකු වරදකරු කොට ඔහුට දඬුවම් පමුණුවන ලෙස ඉල්ලා නීතිපතිවරයා විසින් ඉදිරිපත් කළ ඇපෑලක් විභාගයට ගැනීමට ශ්රේෂ්ඨාධිකරණය අවසර ලබා දී තිබෙනවා.
අතිරේක සොලිසිටර් ජෙනරාල් ප්රියන්ත නාවාන විසින් ඉදිරිපත් කළ කරුණු සලකා බැලීමෙන් අනතුරුවයි ශ්රේෂ්ඨාධිකරණය මෙම තීරණයට එළඹුණේ.
මෙම පෙත්සම් විභාගය එස්. තුරෙයිරාජා, ශිරාන් ගුණරත්න සහ ජනක් සිල්වා යන මහත්වරුන්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඬුල්ලක් ඉදිරියෙහි පවත්වනු ලැබුවා.
1998 වසරේ දකුණු කොරියාවේදී 18 හැවිරිදි තරුණියක් දූෂණය කිරීමේ චෝදනාව සම්බන්ධයෙන් මතු තාක්ෂණික කාරණා හේතුවෙන් එහිදී අදාළ විත්තිකරු නිදහස් කිරීමට කොරියානු අධිකරණය විසින් නියම කර තිබුණා.
එහෙත් මෙම විත්තිකරු සම්බන්ධයෙන් නිසි නීතිමය පියවර ගන්නා ලෙස කොරියානු ශ්රී ලංකා අන්යෝන්ය සහයෝගීතා ගිවිසුම යටතේ කොරියානු රජය විසින් ශ්රී ලංකා රජය වෙත ඉල්ලීමක් කර තිබුණා.
ඒ අනුව නීතිපතිවරයා විසින් අදාළ විත්තිකරුට එරෙහිව කොළඹ මහාධිකරණය හමුවේ නඩු පවරනු ලැබුවා.
දීර්ඝ නඩු විභාගයකින් අනතුරුව විත්තිකරුට එරෙහි චෝදනා සාධාරණ සැකයකින් තොරව ඔප්පු කිරීමට පැමිණිල්ල අසමත් වී ඇතැයි තීන්දු කළ කොළඹ මහාධිකරණය අදාළ නිදොස් කොට නිදහස් කිරීමට නියෝග කළ බව අතිරේක සොලිස්ටර් ජනරාල් ප්රියන්ත නාවාන නඩු විභාගයේ දී සඳහන් කළා.
එහෙත් එම මහාධිකරණ තීන්දුවට එරෙහි ව නීතිපතිවරයා විසින් අභියාචනාධිකරණය හමුවේ ඇපෑලක් ඉදිරිපත් කළත්; අභියාචනාධිකරණය විසින් ද එම මහාධිකරණ තීන්දුව තහවුරු කළ බව ඔහු කියා සිටියා.
ඒ අනුව අදාළ විත්තිකරුට එරෙහි ව ශ්රේෂ්ඨාධිකරණය හමුවේ මෙම අභියාචනා පෙත්සම ඉදිරිපත් කළ බවත් අතිරේක සොලිසිටර් ජෙනරාල්වරයා සඳහන් කර සිටියා.
මෙහිදී පෙත්සම්කාර සහ වගඋත්තරකාර පාර්ශ්ව විසින් ඉදිරිපත් කළ කරුණු සලකා බැලූ එස්. තුරෙයිරාජා ප්රමුඛ ත්රිපුද්ගල ශ්රේෂ්ඨාධිකරණ විනිසුරු මඬුල්ල නීතිපතිවරයා විසින් ඉදිරිපත් කළ අභියාචනා පෙත්සම විභාගයට ගැනීමට අවසර ලබා දුන්නා.
ඒ අනුව අදාළ අභියාචනා පෙත්සම් විභාගය පෙබරවාරි මස 01 වන දා සිදු කරන බවයි අධිකරණ නියෝගයේ සඳහන් වුණේ.
