තුන්වන එක්දින තරගයට යළිත් වැස්සෙන් බාධා

ශ්‍රී ලංකාව සහ සිම්බාබ්වේ කණ්ඩායම් අතර පැවැත්වෙන තුන්වන සහ අවසන් එක්දින ක්‍රිකට් තරගයට යළිත් වර්ෂාවෙන් බාධා එල්ලවී තිබෙනවා.

තරගය යළිත් නතර කරන විට කාසියේ වාසිය දිනා පළමුවෙන් පන්දුවට පහරදෙමින් සිටි සිම්බාබ්වේ කණ්ඩායම පන්දුවාර 11යි පන්දු 5ක් අවසානයේ කඩුලු 3ක් දැවී ලකුණු 48ක් ලබා සිටියා. එම කඩුලු 3 දවා ගත්තේ වනිඳු හසරංග විසින්.

ආර් ප්‍රේමදාස ක්‍රීඩාංගණයේ පැවැත්වෙන මෙම තරගය පන්දුවාර 7යි පන්දු 4ක්ව තිබියදීත් වර්ෂාව හේතුවෙන් නතර කෙරුණා.

පැය දෙකකටත් වැඩි කාලයකින් යළි තරගය ආරම්භ කරනු ලැබුවේ එක් කණ්ඩායමකට පන්දුවාර 43බැගින් ලබාදී තරගය පවත්වගෙන යාමේ තීරණය මතයි.

එහෙත් යළිත් වර්ෂාව පතිත වීම හේතුවෙන් තරගය තාවකාලිකව නතර කෙරුණු අතර මෙතෙක් ඒ සම්බන්ධයෙන් අවසන් තීරණයක් ගෙන නැහැ.

දෙරට අතර පැවති පළමු එක්දින තරගය වර්ෂාව හේතුවෙන් ජය පරාජයෙන් තොරව අත්හැර දැමුණා.

දෙවන තරගය ශ්‍රී ලංකාව ජය ගත්තේ කඩුලු දෙකකින්. එබැවින් මෙම තුන්වන එක්දින තරගය තරගාවලියේ ජය තමන් සතු කර ගැනීමට ශ්‍රී ලංකාවට අතිශයින් වැදගත් වනවා.