තැපැල් ඡන්ද අයදුම්පත් භාරගැනීම අදින් අවසන් – අයදුම්කරුවන්ට විශේෂ දැනුම්දීමක්

2024 ජනාධිපති මැතිවරණයට ඇත්තේ තවත් දින හතළිස් හයක කාලයක් පමණයි.

ජනාධිපතිවරණය වෙනුවෙන් වන තැපැල් ඡන්ද අයදුම්පත් භාරගැනීම අදින් අවසන් බවයි මැතිවරණ කොමිෂන් සභාව දැනුම් දුන්නේ.

මේ අතර අපේක්ෂකයින් 14 දෙනෙක් එළඹෙන ජනාධිපතිවරණය සඳහා මේ වනවිටත් ඇපමුදල් තැන්පත්කර තිබෙනවා.

ජනාධිපතිවරණය ප්‍රකාශයට පත් කිරීමත් සමඟ තැපැල් ඡන්දය සඳහා අයදුම්පත් කැදවීමේ චක්‍රලේඛය මැතිවරණ කොමිසන් සභාව විසින් ප්‍රකාශයට පත් කරනු ලැබුවා.

ඒ, අනුව අදාළ තැපැල් ඡන්ද අයදුම්පත්‍ර භාරදීමට ලබා දී තිබූ කාලය අදින් අවසන් වනවා.

තවමත් තැපැල් ඡන්දය සඳහා ඉල්ලුම් කර නොමැති පුද්ගලයින්, අද මධ්‍යම රාත්‍රියට පෙර එම අයදුම්පත්‍ර භාරදෙන ලෙසයි මැතිවරණ කොමිෂන් සභාව දැනුම් දෙන්නේ.

මැතිවරණ කොමිෂන් සභාවේ නිල වෙබ් අඩවියේ තමන්ගේ ලියාපදිංචියට අදාළ තොරතුරුවලට අනුව, තැපැල් ඡන්ද අයදුම්පත් සම්පූර්ණ කර ස්වකීය ආයතනයේ සහතික කිරීමේ නිලධාරියා මඟින් ඡන්ද හිමි නාම ලේඛනයේ නම සදහන් දිස්ත්‍රික්කයේ, දිස්ත්‍රික් මැතිවරණ කාර්යාලය වෙත භාරදිය යුතු වනවා.

කිසිම හේතුවක් මත තැපැල් ඡන්ද අයදුම්පත් භාර ගැනීමේ දිනය දීර්ඝ නොකරන බවයි එම කොමිෂන් සභාව සඳහන් කළේ.

මේ අතර ජනාධිපතිවරණයට අදාළව අද දිනයේ දී මාධ්‍ය ආයතන ප්‍රධානීන් මැතිවරණ කොමිෂන් සභාව වෙත කැඳවා තිබෙනවා.

හෙට සිට අමාත්‍යාංශ මට්ටමින් අමාත්‍යාංශ ලේකම්වරු, අතිරේක ලේකම්වරු ඇතුළු නිලධාරීන් ද මැතිවරණ කොමිෂන් සභාව හමුවට කැඳවීමට නියමිතයි.

නිදහස් හා සාධාරණ මැතිවරණයක් පැවැත්වීම සඳහා අවශ්‍ය පසුබිම සකස් කරගැනීම වෙනුවෙන් මෙම සාකච්ඡා සිදුකරන බවයි ජාතික මැතිවරණ කොමිෂන් සභාව පැවසුවේ.

මේ අතර සැප්තැම්බර් 21 වනදා පැවැත්වීමට නියමිතය ජනාධිපතිවරණය වෙනුවෙන් අපේක්ෂකයින් 14 දෙනෙකු මේ වනවිටත් ඇප මුදල් තැන්පත් කර තිබෙනවා.

ඔවුන් අතරින් අටදෙනෙක් පිළිගත් දේශපාලන පක්ෂ නියෝජනය කරන අතර, අපේක්ෂනයින් පස්දෙනෙක් වෙනත් දේශපාලන පක්ෂවලින් හෝ ස්වාධීන අපේක්ෂකයින් ලෙස ඉදිරිපත්ව සිටිනවා.

ජනාධිපතිවරණය වෙනුවෙන් එළඹෙන 15 වනදා පෙරවරු 9.00 සිට පෙරවරු 11.30 දක්වා නාමයෝජනා භාරගැනීම සිදුකරනවා.