ත්රස්ත විරෝධී පනත් කෙටුම්පතේ අන්තර්ගත ඇතැම් වගන්ති ආණ්ඩුක්රම ව්යවස්ථාවට පටහැනිය යැයි තීන්දු කොට ඒවා සම්මත කිරීමට නම් පාර්ලිමේන්තුවේ තුනෙන් දෙකක බහුතර ඡන්දයකින් සහ ජනමත විචාරණයකින් අනුමත විය යුතු බවට තීන්දුවක් ලබාදෙන ලෙස ඉල්ලා මේ වන විට ශ්රේෂ්ඨාධිකරණය හමුවේ පෙත්සම් 27ක් ගොනුකර තිබෙනවා.
සමගි ජන බලවේගයේ මහලේකම් රංජිත් මද්දුමබණ්ඩාර, ජාතික නිදහස් පෙරමුණේ පාර්ලිමේන්තු මන්ත්රී විජිත හේරත්, ශ්රී ලංකා මුස්ලිම් කොංග්රසයේ මහලේකම් නිසාම් කාරියප්පර්, විකල්ප ප්රතිපත්ති කේන්ද්රය, සමාජවාදී තරුණ සංගමය, පෙරටුගාමී සමාජවාදී පක්ෂයේ ප්රචාරක ලේකම් දුමින්ද නාගමුව, ශ්රී ලංකා වෘත්තිය පත්රකලාවේදීන්ගේ සංගමය ඇතුළු පිරිසක් විසිනුයි මෙම පෙත්සම් ගොනුකර කර ඇත්තේ.
එම පෙත්සම්වල වගඋත්තරකරු ලෙස නීතිපතිවරයා නම්කර තිබෙනවා.
අදාළ පනත් කෙටුම්පතේ අන්තර්ගත විධිවිධාන වලින් යුද හමුදාව, පොලිසිය සහ වෙරළාරක්ෂක බලකායට ඕනෑම පුද්ගලයකු සාධාරණ හේතුවක් නොමැතිව අත්අඩංගුවට ගෙන රඳවා ගැනීමේ බලය ලබාදී තිබෙන බව පෙත්සම්කරුවෝ කියා සිටීයි.
මේ තුළින් ආණ්ඩුක්රම ව්යවස්ථාව මඟින් සහතික කර තිබෙන පුද්ගල නිදහස, අදහස් ප්රකාශ කිරීම නිදහස ඇතුළු මූලික අයිතීන් උල්ලංඝනය වන බවත් පෙත්සම්කරුවන් පෙන්වා දෙයි.
ඒ හේතුවෙන් අදාළ පනත් කෙටුම්පත සම්මත කිරීමට අවශ්ය නම් පාර්ලිමේන්තුවේ තුනෙන් දෙකක බහුතර ඡන්දයකින් සහ ජනමත විචාරණයකින් එය අනුමත විය යුතු බවට තීන්දුවක් ලබා දෙන ලෙසත් ඔවුන් ශ්රේෂ්ඨාධිකරණයෙන් ඉල්ලා සිටී.
