තවත් වසර 5ක කාලයක් ශ්රී ලංකාවේ පාසල් දරුවන් පෝෂණය කිරීමේ වැඩසටහන සඳහා එක්සත් ජනපද තානාපති කාර්යාලය ඩොලර් මිලියන 32.5ක නව ප්රදානයක් ප්රකාශයට පත් කර තිබෙනවා.
නිවේදනයක් නිකුත් කරමින් තානාපති කාර්යාලය පැවසුවේ කුසගින්න අඩු කරන සහ සාක්ෂරතාවය මෙන්ම ප්රාථමික අධ්යාපනය වැඩිදියුණු කරන ආහාර ආධාර වැඩසටහනක් වන McGovern-Dole International Food for Education and Child Nutrition වැඩසටහන සඳහා එක්සත් ජනපද කෘෂිකර්ම දෙපාර්තමේන්තුව (USDA) වෙතින් ශ්රී ලංකාවට මෙම අරමුදල ලබා දී ඇති බවයි.
පාසල් ආහාර, ගුරු පුහුණුව වැනි සහාය ලබා දීමෙන්, McGovern-Dole ව්යාපෘතිය මගින් පාසල් අධ්යයන කාර්ය සාධනය ඉහළ නැංවීමට උපකාරී වන බවයි තානාපති කාර්යාලය ප්රකාශ කළේ.
ශ්රී ලංකා රජය සමඟ එක්ව Save the Children විසින් ක්රියාත්මක කරන ලද දැනට පවතින වැඩසටහන් මත පදනම්ව ඉදිරි වසර 5 තුළ නුවරඑළිය, බදුල්ල, මොණරාගල, රත්නපුර, කිලිනොච්චි, මුලතිව්, ත්රිකුණාමලය සහ කොළඹ දිස්ත්රික්කවල ශ්රී ලාංකික දරුවන් 200,000කට වැඩි පිරිසකට මෙම වැඩසටහනෙන් ප්රතිලාභ ලැබෙනු ඇති.
එක්සත් ජනපදයේ අරමුදල් සහිත පාසල් පෝෂණ වැඩසටහන සක්රීයව පවතින ස්ථාන කිහිපයක සංචාරය කළ එක්සත් ජනපද තානාපතිනි ජුලී චන්ග් පැවසුවේ, පාසල් පෝෂණ වැඩසටහන ශ්රී ලාංකීය දරුවන්ගේ ජීවිත කෙරෙහි ඇති කරන පරිවර්තනීය බලපෑම තමාට දැක ගැනීමට ලැබුණු බවයි. මෙම වැඩසටහන් ඉතා වැදගත් වන අතර, රට පුරා සිටින ළමුන් සඳහා පෝෂණය සහ අධ්යාපනය වැඩි දියුණු කිරීම සහ ශ්රී ලංකාවේ ජනතාව සඳහා ඇමරිකාවේ දිගු කාලීන කැපවීම පිළිබිඹු කරන බවයි තානාපතිනිය පෙන්වා දෙන්නේ.
රජයේ පාසල් ආහාර වැඩසටහනේ කොටසක් ලෙස දිස්ත්රික්ක හතක (නුවරඑළිය, බදුල්ල, මොණරාගල, රත්නපුර, කිලිනොච්චි, මුලතිව් සහ ත්රිකුණාමලය) පාසල් 852ක ළමුන් 95,000කට අධික පිරිසකට පෝෂ්යදායී ආහාර ලබා දෙනු ලබනවා. මෙම ව්යාපෘතිය මගින් දරුවන්ගේ සාක්ෂරතා කුසලතා, ගුරුවරුන්ගේ වෘත්තීය පුහුණුව සහ ආරක්ෂිත පානීය ජලය, වැඩිදියුණු කළ මුළුතැන්ගෙයි පහසුකම් සහ පාසල්වල සනීපාරක්ෂක පහසුකම් වැඩිදියුණු කිරීමට ද සහාය වනවා.
McGovern-Dole International Food for Education and Child Nutrition වැඩසටහන ලොව පුරා අඩු ආදායම්ලාභී, ආහාර හිඟ රටවල අධ්යාපනය, ළමා සංවර්ධනය සහ ආහාර සුරක්ෂිතතාව සඳහා උපකාර කරනවා. පාසල් පෝෂණය, මාතෘ සහ ළමා පෝෂණ ව්යාපෘති සඳහා ආධාර කිරීම සඳහා එක්සත් ජනපද කෘෂිකාර්මික භාණ්ඩ පරිත්යාග කිරීම මෙන්ම මූල්ය සහ තාක්ෂණික ආධාර සඳහා මෙම වැඩසටහන සපයනු ලබනවා.
මෙම වසරේ එක්සත් ජනපද-ශ්රී ලංකා රාජ්ය තාන්ත්රික සබඳතාවල 75 වැනි සංවත්සරය ද සනිටුහන් කරනවා.
