ඩොලරයේ අගය ඉහළට

අද දිනයේ මෙරට වාණිජ බැංකුවල විනිමය අනුපාත අනුව ඇමෙරිකානු ඩොලරයේ ගැනුම් මිල ඊයේ දිනයට සාපේක්ෂව සුළු ඉහළ යාමක් දක්නට ලැබෙනවා.

ඒ ප්‍රධාන රාජ්‍ය බැංකුවල ඊයේ දිනයට සාපේක්ෂව අද දිනයේදී අමෙරිකානු ඩොලරයේ විකිණුම් සහ ගැනුම් මිල වෙනස් වීම හේතුවෙන්.

මහ බැංකුව අද නිකුත් කළ විනිමය අනුපාතිකය අනුව ඇමරිකානු ඩොලරයක විකුණුම් මිල රුපියල් 328.60ක් ලෙසට සටහන් වී ඇති අතර එහි ගැණුම් මිල දැක්වෙන්නේ රුපියල් 311.26ක් ලෙසටයි.

මහජන බැංකුවේ අමෙරිකානු ඩොලරයක ගැනුම් සහ විකිණුම් මිල ඊයේ දිනයට සාපේක්ෂව අද දිනයේදී සුළු වශයෙන් ඉහළ ගොස් තිබෙනවා.

ඊයේ දිනයේදී ඩොලරයක ගැනුම් රුපියල් 308.70ක් වූ අතර එය අද දිනයේදී රුපියල් 310.62ක් ලෙසටයි ඉහළ ගොස් ඇත්තේ.

ඊයේ දිනයේදී ඩොලරයේ විකිණුම් මිල රුපියල් 330.92ක් ලෙස සටහන්වූ අතර එය අද දිනයේදී රුපියල් 332.99ක් ලෙස ඉහළ ගොස් තිබෙනවා.

අද දිනයේදී ලංකා බැංකුවේ අමෙරිකානු ඩොලරයේ ගැනුම් මිල රුපියල් 311ක් වූ අතර විකිණුම් මිල රුපියල් 329.54ක් ලෙසටයි සටහන් ව ඇත්තේ.

මේ අතර අද දිනයේදී සම්පත් බැංකුවේ විනිමය අනුපාත අගයන් අනුව අමෙරිකානු ඩොලරයේ ගැනුම් මිල රුපියල් 310ක් ලෙස සටහන්ව තිබෙන අතර ඩොලරයේ ගැනුම් මිල රුපියල් 325ක් ලෙස සටහන්ව තිබෙනවා.

කොමර්ෂල් බැංකුවේ අමෙරිකානු ඩොලරයේ ගැනුම් මිල අද රුපියල් 311.69ක් ලෙස සටහන්වූ අතර ඩොලරයේ විකිණුම් මිල රුපියල් 330ක් ලෙස සටහන්ව තිබුණා.

අද දිනයේ සෙලාන් බැංකුවේ ඇමරිකානු ඩොලරයේ ගැනුම් මිල රුපියල් 309ක් ලෙස සටහන්ව තිබෙන අතර විකිණුම් මිල රුපියල් 331ක් ලෙස සටහන්ව තිබෙනවා.

හැටන් නැෂනල් බැංකුවේ අමෙරිකානු ඩොලරයේ අද ගැනුම් මිල රුපියල් 310ක් සහ විකුණුම් මිල රුපියල් 330ක් ලෙසටයි සටහන්ව ඇත්තේ.

මේ අතර ඇමරිකානු ඩොලර් බිලියන 2.9 ක පැකේජයේ පළමු වාරිකය ශ්‍රී ලංකාවට ලැබීමත් සමඟ ශ්‍රී ලංකා රුපියල ශක්තිමත් වී ඩොලරයේ අගය තවදුරටත් පහත වැටෙනු ඇති බව විශේෂඥයන් අදහස් පළ කරනවා.

දේශීය මුදල් ඒකකය ශක්තිමත් වීමේ ප්‍රතිඵලයක් ලෙස ආනයනික භාණ්ඩ රැසක මිල ඉදිරියේදී අඩුවනු ඇති බවයි ඔවුන් පෙන්වා දෙන්නේ.

මහනුවරදී මාධ්‍ය වෙත අදහස් දක්වමින් ආර්ථික විශ්ලේෂක ආචාර්ය චමින්ද මලලසේකර කියා සිටියේ වත්මන් පාලනය ගෙන යන ආර්ථික හා ප්‍රතිසංස්කරණ වැඩසටහන හේතුවෙන් පළමු වාරිකය ශ්‍රී ලංකාවට ලබාදීමට ජාත්‍යන්තර මුල්‍ය අරමුදල තීරණය කළ බවයි.

මෙම තත්ත්වය තවදුරටත් පවත්වා ගැනීම සඳහා වත්මන් ආර්ථික වැඩපිළිවෙළ තුළ දැඩි විනයක් ඇතිව රැඳී සිටීම අත්‍යවශ්‍ය බව ආචාර්යවරයා අවධාරණය කරනවා.

සාමාන්‍ය ණය සහ ජාත්‍යන්තර මූල්‍ය අරමුදල අනුමත කරන ණය අතර පැහැදිලි වෙනසක් ඇති බවත්, රටක ආර්ථික ක්‍රියා පටිපාටිය නිවැරදි දිශාවට ගමන් කිරීම සඳහා නිතර උපදෙස් ලබා දෙමින් උපදෙස් ලබාදෙන බවත් ආචාර්ය චමින්ද මලලසේකර මහතා ප්‍රකාශ කළා.

පසුගිය වසරේ අප්‍රේල් මාසයේදී ජාත්‍යන්තර වශයෙන් ශ්‍රී ලංකාව බංකොලොත් රාජ්‍යයක් ලෙස නම් කිරීමෙන් පසු රට අවුල් සහගත තත්ත්වයකට පත්වීම වැළැක්වීමට සමාජයේ ඇතැම් කොටස්, නිලධාරීන් සහ බලයේ සිටින අය වෙහෙස නොබලා කටයුතු කිරීම ප්‍රශංසනීය බවයි ඔහු සඳහන් කළේ.