එක්දින ලෝක කුසලාන අවසන් මහා තරගයේ දී ඉන්දීය ක්රිකට් පිළ ලැබූ පරාජයෙන් පසු ඉන්දීය ක්රිකට් කණ්ඩායමේ ප්රධාන පුහුණුකරු ලෙස තවදුරටත් කටයුතු නොකිරීමට රාහුල් ඩ්රාවිඩ් තීරණය කර තිබෙනවා.
ලෝක කුසලාන තරගාවලිය අවසන් වූ පසු ඩ්රාවිඩ්ගේ වසර දෙකක කොන්ත්රාත්තුව ද අවසන් වූ අතර, එය යළිත් දීර්ඝ නොකිරීමට ඔහු තීරණය කර ඇති බවයි වාර්තා වන්නේ.
එම තීරණය ඩ්රාවිඩ් ඉන්දීය ක්රිකට් පාලක මණ්ඩලය වෙත දැනුම් දී ඇති බවයි විදෙස් වාර්තා සඳහන් කළේ.
රාහුල් ඩ්රාවිඩ් වෙනුවට වීවීඑස් ලක්ෂ්මන් ඉන්දීය කණ්ඩායමේ ප්රධාන පුහුණුකරු ලෙස පත් කිරීමට නියමිත බවට තොරතුරු වාර්තා වනවා.
ඔහු මේ වනවිට ඉන්දීය දෙවැනි පෙළ කණ්ඩායමේ ප්රධාන පුහුණුකරු ලෙස කටයුතු කරන අතර, ඉන්දීය ජාතික කණ්ඩායමේ ප්රධාන පුහුණුකරු ධුරය සඳහා ලක්ෂ්මන් සිය කැමැත්ත පළ කර ඇති බවයි වාර්තා වන්නේ.
ඒ, අනුව ඔහු ඉන්දීය ක්රිකට් පාලක මණ්ඩලය සමඟ දිගුකාලීන ගිවිසුමක් අත්සන් කිරීමට බොහෝ දුරට ඉඩ ඇති බවයි විදෙස් මාධ්ය වැඩිදුරටත් තොරතුරු වාර්තා කළේ.
කෙසේ වෙතත් වී.වී.එස්. ලක්ෂ්මන් මේ වනවිට ඕස්ට්රේලියාව සමඟ පැවැත්වෙන විස්සයි විස්ස තරගාවලිය තුළ ඉන්දීය කණ්ඩායමේ පුහුණුකරු තනතුරේ කටයුතු කරනු ලබනවා.
මේ අතර රාහුල් ඩ්රාවිඩ් අයි.පී.එල් කණ්ඩායමක් සමඟ සාකච්ඡා කරමින් සිටින බවට ද තොරතුරු වාර්තා වනවා.
