මේ දිනවල රත්නපුර නව නගර මාර්ගයේ ගමන් ගන්නා ඔබට මාර්ග අයිනේ ඇති ගස් සියල්ලේම (103ක) අංක යොදා ඇති බව දක්නට ලැබේ. ඒ පිළිබදව සොයා බැලීමේදී දැනගන්නට ලැබුණේ ඇවිදින මංතීරුවක් සකස් කිරීම සදහා කපා ඉවත් කිරීම සදහා එම අංක යොදා ඇති බවයි. ජපන් ජාතිකයන් විසින් 1988දී පමණ මෙම මාර්ගය ඉදිකිරීමේදී තවත් අවුරුදු 50කටවත් විශාල නොකළ යුතු ලෙස මෙම මාර්ගය ඉදිකොට ඇත.
එසේම මෙම මාර්ගයට සාපේක්ෂව අතුරු මාර්ග කිහිපයක්ම සකස් කොට ඇත. එම අතුරු මාර්ගයන් බොහොමයක් අද වන විට භාවිතයට නොගැනීම නිසා වල් බිහිවී විවිධ අපචාරයන් සිදුවන හෝ ‘පරිසර හිතකාමී’ මහත්ම මහත්මීන් විසින් කසල ගෙනැවිත් දමන තෝතැනි බවට පත්ව ඇත. මෙවැනි ඇවිදින මංතීරුවක් සෑදීමට අවශ්‍යම නම් එම අතුරු මාර්ගයන් හොදටම ප්‍රමාණවත් වේ. එසේත් නොමැති නම් ඇවිදීම සදහා දැනටමත් අවශ්‍ය විශාලත්වයෙන් නව නවනගර මාර්ගය ප්‍රමාණවත් වේ.
බොහෝ විට සවස් භාගය වන විට මාර්ගයේ රථවාහන තද බදයද අවම බැවින් ඕනෑම අයකුට ඕනෑම ආකාරයකට ඇවිදීමට පුලුවන. එසේම අවසාන වශයෙන් කීමට ඇත්තෙ ඇවිදින මංතීරැව සකස් කිරීමට පෙර රත්නපුර නගරයට පැමිණෙන අති විශාල වාහන ප්‍ර්‍රමාණය ගාල් කිරීම සදහා රථවාහන අංගනයක් සකස් කරනවානම් ඉතාමත් අගනා කටයුත්තක් බවයි.
