ජේජු ගුවන් යානයේ කළු පෙට්ටියෙන් තොරතුරු රැසක් අනාවරණය වෙයි

පසුගියදා ලොවම කම්පාවට පත් කරමින් දකුණු කොරියාවේ සිදු වූ ගුවන් යානා අනතුර සම්බන්ධයෙන් එම යානාවේ කළු දත්ත ගබඩා පෙට්ටියෙන් කරුණු රැසක් අනාවරණය වී තිබෙනවා.

අල් ජසීරා පුවත් සේවය පැවසුවේ; අදාළ ගුවන් යානයේ ගුවන් නියමු කුටි රෙකෝඩරයෙන් මූලික දත්ත උපුටාගෙන අවසන් බවයි.

දකුණු කොරියාවේ ගුවන් තොටුපොළකට ගොඩබෑමකට හදිසි අවස්ථාවක් ඉල්ලා එම ගොඩබෑම සිදු කරන අවස්ථාවේ දී යානය පිපිරීමකට ලක් ව එහි ගමන් කළ දකුණු කොරියානු ජාතිකයින් ඇතුළු 179 දෙනෙකු එම ස්ථානයේ ම ජීවිතක්ෂයට පත් වුණා.

සිවිල් ගුවන් සේවා නියෝජ්‍ය අමාත්‍ය Joo Jong-wan ප්‍රකාශ කළේ නියමු කුටියේ හඬ පටිගත කිරීමේ දත්ත අවසන් කර ඇති බවයි.

එම මූලික දත්ත මත පදනම් ව ඒවා ශ්‍රව්‍ය ආකෘතියට පරිවර්තනය කිරීමට සැලසුම් කර ඇති බවයි පැවසෙන්නේ.

එමෙන්ම යානයේ දෙවැනි කළු පෙට්ටිය හානි වීම හේතුවෙන් එහි අඩංගු තොරතුරු දේශීය විමර්ශකයින්ට සොයා ගැනීමට නොහැකි වූ බවත් එබැවින් එය වැඩිදුර විශ්ලේෂණය සඳහා එක්සත් ජනපදයට යැවූ බවත් වාර්තා වනවා.

2216 ගුවන් යානය දෙසැම්බර් 29 වැනි දින සෝල් නගරයට නිරිත දෙසින් 290km (සැතපුම් 180) පමණ දුරින් Muan ජාත්‍යන්තර ගුවන් තොටුපළේ දී කඩා වැටුණු අතර, යානයේ සිටි පුද්ගලයන් 181 න් 179 දෙනෙක් මියගියා.

මෙම අනතුර දකුණු කොරියානු භූමියේ මෙතෙක් සිදු වූ දරුණුතම ගුවන් ව්‍යසනය වන අතර 1997 දී කොරියානු එයාර් බෝයිං 747 ගුවාම් කඳු බෑවුමකට කඩා වැටී පුද්ගලයින් 228 දෙනෙකු මියගිය පසු දකුණු කොරියානු ගුවන් සේවයක් සම්බන්ධ මාරාන්තික අනතුර ද වනවා.