ජාතික හැඳුනුම්පත නොමැතිවීම හේතුවෙන් වැඩිහිටි දීමනාව අහිමි වූ අඩු ආදායම්ලාභී පවුල්වල වැඩිහිටි පුද්ගලයන් සඳහා ජාතික හැඳුනුම්පත් සකස්කර දීමේ විශේෂ වැඩසටහනක් ආරම්භ කර තිබෙනවා.
ජාතික වැඩිහිටි මහලේකම් කාර්යාලය, පුද්ගලයන් ලියාපදිංචි කිරීමේ දෙපාර්තමේන්තුව සහ රෙජිස්ට්‍රාර් ජනරාල් දෙපාර්තමේන්තුව එක්ව මෙම වැඩසටහන ක්‍රියාත්මක කරනු ලබනවා.
ඒ, අනුව ජාතික හැඳුනුම්පත නොමැති වීම හේතුවෙන් වැඩිහිටි දීමනාව අහිමි වී සිටින ජ්‍යෙෂ්ඨ පුරවැසියෙකු ඇත්නම්, ග්‍රාම නිලධාරී, ප්‍රජා සවිබලගැන්වීමේ නිලධාරී හෝ වැඩිහිටි හිමිකම් ප්‍රවර්ධන නිලධාරී හමුවන ලෙසයි දැනුම් දෙන්නේ.
වැඩිහිටි පුද්ගලයන් සඳහා වන ජාතික මහලේකම් කාර්යාලය මඟින් අඩු ආදායම්ලාභී පවුල්වල වයස අවුරුදු 70ට වැඩි ජ්‍යෙෂ්ඨ පුරවැසියන් සඳහා රුපියල් 5,000ක මාසික දීමනාවක් ලබා දෙනවා.
මේ වන විට අස්වැසුම ගිණුම් මගින් ජ්‍යෙෂ්ඨ පුරවැසියන් 698,790 දෙනෙකුට සහ තැපැල් කාර්යාල මගින් 232,496කට මෙම වැඩිහිටි දීමනාව ලබාදීම සිදුකරනු ලබනවා.
