ඉන්දියාව සහ ජපානය අතර පැවැති උසස් පෙළේ රාජ්‍ය තාන්ත්‍රික හමුවකින් අනතුරුව නිකුත් කරන ලද ඒකාබද්ධ ප්‍රකාශයට “දේශසීමා හරහා සිදුවන ත්‍රස්තවාදය” පිළිබඳ අදහස් ඇතුළත් කිරීම සම්බන්ධයෙන් පාකිස්ථානය සිය දැඩි කනස්සල්ල සහ අප්‍රසාදය පළ කර තිබෙනවා.
ජපානය වැනි බලවත් ආසියානු රටක් ඉන්දියාවේ පාර්ශ්වීය මතවාදයන් වෙනුවෙන් පෙනී සිටීම පිළිබඳව ඉස්ලාමාබාද් පාලනය දැඩි ලෙස කලබලයට පත්ව සිටිනවා.
මෙම ඒකාබද්ධ ප්‍රකාශය මගින් දකුණු ආසියානු කලාපයේ පවතින ත්‍රස්තවාදී තර්ජන පිළිබඳව අවධානය යොමු කර ඇති අතර, ත්‍රස්තවාදයට රැකවරණය දෙන සහ අනුග්‍රහය දක්වන පාර්ශ්වයන්ට එරෙහිව දැඩි ලෙස ක්‍රියා කළ යුතු බවට අවධාරණය කර තිබෙනවා.
ජපානය සහ ඉන්දියාව එක්ව නිකුත් කළ මෙම ප්‍රකාශය පාකිස්ථානය මුළුමනින්ම ප්‍රතික්ෂේප කරන අතර, ඉන්දියාව විසින් තමන්ට එරෙහිව ගෙන යන දේශපාලන ප්‍රචාරණ ව්‍යාපාරයකට ජපානය හසු වී ඇති බවට ඉස්ලාමාබාද් විදේශ අමාත්‍යාංශය චෝදනා කරනවා.
දකුණු ආසියාවේ ආරක්ෂක සමතුලිතතාවය පිළිබඳව කතා කිරීමේදී ඉන්දියාවේ ඒකපාර්ශ්වික ස්ථාවරය පමණක් නිරූපණය වන පරිදි ප්‍රකාශ නිකුත් කිරීම කලාපීය ස්ථාවරත්වයට සුදුසු නොවන බව පාකිස්ථාන බලධාරීන් පෙන්වා දෙනවා.
විශේෂයෙන්ම, ජපානය වැනි කලාපීය ආර්ථික බලවතෙකු ඉන්දියාව සමඟ එක්ව මෙවැනි ප්‍රකාශ නිකුත් කිරීම තුළින් පාකිස්ථානය ජාත්‍යන්තරය හමුවේ රාජ්‍ය තාන්ත්‍රිකව හුදකලා කිරීමට ඉන්දියාව දරන උත්සාහයට තල්ලුවක් ලැබෙන බවට පාකිස්ථානය භීතිය පළ කරනවා.
