නීතිඥ සංගමයේ හිටපු සභාපති ජනාධිපති නීතිඥ සාලිය පීරිස් මහතා අරගල සමයේ රටේ අගමැති ධුරය භරගැනීමට සූදානමින් සිටි බව ජනාධිපති රනිල් වික්‍රමසිංහ මහතා අද පාර්ලිමේන්තුවේදී ප්‍රකාශ කළා.
පසුගිය වසරේ මැයි 9 වැනිදා සිදු වූ අරගලය සහ ඊට සම්බන්ධ සිද්ධීන් පිළිබඳ විමර්ශනයක් ආරම්භ කිරීමට විශේෂ කොමිෂන් සභාවක් පත් කිරීමට කටයුතු කළ යුතු බවයි ජනාධිපතිවරයා සඳහන් කළේ.
ජාතික ලැයිස්තුවෙන් පාර්ලිමේන්තුවට පැමිණි මන්ත්‍රීවරයෙකුට එම ධුරයෙන් ඉවත් වී ස්වාධීන අගමැතිවරයෙක් ලෙසට පත් කිරීමට ද එහිදී සාකච්ඡා වූ බවයි ජනාධිපතිවරයා පෙන්වා දුන්නේ.
නීතිඥ සංගමය අරගලය පැවති දිනවල එවක ජනාධිපති ගෝඨාභය රාජපක්ෂ හමුවී ඔහු සමග සාකච්ඡා කරනු ලැබුවේ දේශපාලනයෙන් තොර අයෙක් අගමැතිවරයා ලෙසට පත් කිරීම බව රනිල් වික්‍රමසිංහ මහතා කියාසිටියා.
ඔවුන් බලාපොරොත්තු වූයේ සාලිය පීරිස් මහතා අගමැති ධුරයට පත්වනු ඇති බවට වන අතර එය රහසක් නොවන බවයි ජනාධිපතිවරයා සඳහන් කළේ.
මේ අතර බිඳ වැටුණු රටේ ආර්ථිකය සම්බන්ධයෙන් ප්‍රසිද්ධ විවාදයකට පැමිණෙන ලෙස විපක්ෂනායක සජිත් ප්‍රේමදාස අමාත්‍ය බන්දුල ගුණවර්ධනට අභියෝග කිරීමත් සමඟ අදත් පාර්ලිමේන්තුවේ උණුසුම් තත්ත්වයක් හටගත්තා.
